SARATOK: Penemu ti madahka nempa ulah nembiak nya pangku pengawa pengajar aja patut diubah.
Sapit Menteri Pengeluar Kuasa enggau Pengeraja Asal, Ali Biju madah, pekara tu patut diperunding manah ngambika semua nembiak sekula ngembuan basa enggau ulah ti menyana.
Ku iya, basa tu nyengkaum jaku enggau ulah, nya kebuah kitai enda patut ngelempaika tanggungpengawa tu ngagai bala pengajar tauka piak sekula aja.
“Enti orang nya ngembuan basa, iya ukai semina bejaku ngena jaku ti siru sereta alus tang mega ngembuan ulah ti dipuji.
“Ambika chunto, enti orang nya seruran nyebut jaku sumpah sereta ngeluarka jaku changka, tu mandangka ulah iya ti enda menuku sereta jampat muras.
“Nya alai, chara bejaku enggau ulah seruran nguing runding lalu ulih nentuka tikas basa kitai siku-siku. Tu pekara pemadu beguna dipun ba rumah lalu ditampung ba sekula,” ku iya ti mega Kaban Parlimen Saratok.
Jaku Ali nya disebut pengari iya ari Palan Servis Komuniti Sitak Parlimen Saratok rambau pejalai nyuaka chek Projek Mit Pemansang Menua Pesisir (MRP) ngagai Serakup Apai Indai enggau Pengajar (PIBG) empat buah sekula ditu, apin lama ke udah.
Berebak enggau nya, PIBG Sekula Sekondari (SMK) BM Saratok enggau Kolej Pom 6 bela nerima RM15,000 seraya PIBG Sekula Primari (SK) Lubok Nibong (RM7,000) lalu SK Alit (RM10,000).
Iya madah, agih belanja diberi nya dikearap ulih dikena piak sekula ngaul bala pengajar enggau apai indai ngatur program tauka aktiviti ti ulih nempa pemanah ulah nembiak.
Berita penuh ba Ruai 7 pagila
