Nemuai Ke Malaysia 2020: S’wak pematak temuai luar

KUCHING: Opis Menteri Dagang Temuai, Seni, Main Asal, Nembiak enggau Lumba ngarapka Opis Menteri Dagang Temuai Malaysia (Motac) ulih ngemasukka Sarawak nyadi sebagi ari palan dagang temuai menua luar.

Menteri iya, Datuk Abdul Karim Rahman Hamzah madahka pekara nya endang patut diperunding kelebih agi beserimbai enggau taun nemuai ke Malaysia 2020.

“Motac deka ngatur mayuh program sepanjai taun nemuai ke Malaysia taun baru.

“Sarawak ngembuan mayuh palan ti manah endur bala temuai bejalai meda pemanah rampa menua asal,” ku iya.

Karim madah munyi nya lebuh dirandau pemberita pengudah ngulu pengerami bejadika Aum Besai Orkid Asia Pasifik ke-13 (Apoc13) di Palan Konvensyen Borneo Kuching (BCCK) ditu tadi.

Datuk Abdul Karim

Ku iya Sarawak mega chukup temegah ati laban lambang nemuai ke Malaysia 2020 sekali tu ngena lambang Burung Kenyalang.

“Kami temegah ati laban Perintah Malaysia milih enggau ngangkatka Burung Kenyalang nyadi lambang.

“Tu ngasuh rayat Sarawak ngasaika diri dipebasa,” ku iya temegah.

Kelimpah ari nya ku Karim, sida deka seruran meri kerjasama ngagai Perintah Besai ba pemansang dagang temuai menua.

“Kebuah pia laban taun nemuai ke Malaysia ukai semina ngagai Semenanjung Malaysia aja tang mega nyengkaum pulau Borneo; Sarawak enggau Sabah.

“Kami deka nempa kaul kerejasama rat nentuka pengerami tu mega ulih diasai ba Sarawak,” ku iya.

Karim mega madahka Sarawak chukup beruntung laban kimpin nemuai ke Malaysia ba menua tu udah berengkah ari taun 2019.

Suara Sarawak