Serakup Ngasi Sarawak

KUCHING: Ukai muntang munyi jaku enti disebutka pengawa ngaga tauka nengkebang kereban asal bujang berani baka terabai.

Ku Presiden Serakup Ngajat Asal Iban (Ngasi) Sarawak, Ajat Sumoh, nya kebuah sida keran amat matak sida ke tuai ti bepau nengkebang nyereta serakup sereta ngajar rebak baru pasal penemu baka nya.

“Kami sebuat naka ulih ngemai sida ke tuai, ngempung penemu dalam serakup tu lalu penemu tu ditampung ngagai rebak baru ngambika enda punas ngapa.

“Enti kelia, penemu nengkebang tu jarang amat dikembuan enti ukai ari kenyap diasuh antu tauka petara, nampung penemu ari ajar sida ke tuai tauka liat ati sereta ransing belajar,” ku Ajat ngelansa.

Ambika chunto ku Ajat, baka sida indu ti landik beranyam, tang ukai semua buah tikai ulih dianyam sida. Bisi sekeda semina tau nganyam buat tikai ti diambi mimpi, bisi nya ulih nyabang tauka ngiga kenyap sekalika buah tikai ulih diangkat tauka enda, tang mayuh agi buah tikai mali ditunda enti enda chukup tuai bulu.

“Baka nya mega lebuh kami merambu ngaga terabai tu, dulu agi betanyaka runding enggau penemu sida ke tuai, kelebih agi ngagai aya Sibat Anak Manja, peranak asal ari Katibas, Song di Kapit.

“Aya Sibat tu tau jari, chukup landik nengkebang nyengkaum pengawa ngambuh dulu, ilang, pedang enggau sangkuh, landik ngaga enggau nyimpai gendang sereta landik ngaga terabai.

“Iya tu kelia dikumbai pungka lelaki bujang berani Iban, diberita chukup kering, besai langkar tubuh sereta sigat. Serakup kami chukup benasit ngembuan orang ti landik sereta bepenau baka iya tu,” ku Ajat temegah.

Ngaga Terabai

Ari ajar enggau embing aya Sibat tu, raban nembiak Serakup Ngasi Sarawak udah mujur ngatur bengkel ngaga terabai lalu deka nandu pengawa sida ungkup tiga bulan deka datai, berengkah ari September ngagai November.

“Bengkel Ngaga Terabai Ke-1 diatur ba bulan September, dientudi bengkel ke-2 (Oktober) lalu Bengkel Ngukir Terabai enggau Nyimpai Gendang diatur ba bulan November.

“Kesemua penyereta bengkel ti mujur nembuka pelajar deka dirami ba sebengkah pengerami lalu diberi setipikit diperambu ba bulan November, disadang nyerumba Pengawa Bejadika Palan Kereja Serakup Ngasi Sarawak,” ku iya nerang silik.

Ngelansa pasal Bengkel Ngaga Terabai ti udah diatur raban nembiak serakup nya ku Ajat, pengawa dipun enggau ngiga kayu ti engkeman digagaka terabai.

“Kayu pelai ti ditebang deka dilumpung dulu sebedau disayat ngena tinso nyadika papan, udah nya dipansap dataika gamal baka terabai.

“Ripih pengawa mansap papan nyadi terabai chukup lama lalu ati meseti puh, kayu dipansap ngena duku, diketam dataika alus ti mega diansar ngena keretas pasir enggau dipat.

“Udah nya terabai tu deka dijembi dataika rangkai sebedau diukir bungai nitihka ajar aya Sibat, kami ngukir bungai ngelaika bansa Dayak lalu ukai bungai ti ‘berat’ ungkup bujang berani ti kala bedengah.

“Kebuah pia laban tuju kami ngading main asal baka maya mantaika ajat nyengkaum lesung ti digaga ari kayu pelai.

“Kebuah kitai nyembi langkar papan terabai tu ngambika iya tan, enda mudah repuk diempa indu sampuk, lalu kayu pelai mega deka lempung agi dipegai.

“Tembu pengawa ngukir, terabai deka dilinsu ngena chura asal kitai Iban baka chelum, burak, kuning enggau mansau nitihka penau siku-siku,” ku Ajat ngelansa silik ripih pengawa ngaga terabai dataika tembu.

Sekeda ari terabai ti udah tembu digaga deka dijual ngagai bala kaban serakup enggau bala bukai dikena ngulihka belanja sereta nambahka penatai pemisi sida ti nengkebang.

Penemu, pengelandik enggau penau jari baka tu ukai muntang dipelajar, begunaka pengeliat ati laban macham likuh pengawa dikereja sereta enda tau mayuh mulut nangika pengawa jelungan, ku Ajat.

Terabai Bujang Berani

Terabai tu sebagi ari perengka perang kitai Iban, suah agi dikena sida bujang kering berani ngayau, bebunuh, kayau anak sereta ngetanka menua ari munsuh.

Taja pia, terabai mega ulih dikena maya ngajat Bujang Berani sereta ngajat Bebunuh lalu terabai ke digaga sigi besai, ulih disema baka pemesai sereta baruh mimit ari mensia.

Enti kelia, terabai tu digaga ari kayu ti pemadu kering sereta tan baka kayu tebelian, entenong, bandir tapang, kerangan batu, kayu mengering sereta empuas.

Orang ke tau ngaga terabai tu ukai orang sengapa. Sida ti bisi pemendar ari Petara alai ngaga terabai tu iya nya bujang berani ti kala bedengah tauka bulih pala munsuh.

Aya Sibat Manja ti pinchin soldadu madahka terabai mega enda tau diukir sengapa nitihka peneka ati lalu orang ti ngaga ukir ba terabai suah agi milih bansa ukir nitihka bulu sida ti ngena nya.

Ambika chunto, terabai bujang berani udah bulih mayuh pala sigi tentu ngena terabai ke ngembuan ukir ti kering mega lalu bungai ukir ti suah dikena ngukir terabai iya nya Tungaka Matahari Padam sereta Ngerejang Kalimantan Indonesia.

Ku aya Sibat, bisi mega orang ngukir bungai terabai tu dichuan ari mimpi, chura mua jelu sereta antu.

“Terabai diukir ngena lungga, batu sereta getah kayu lalu chura terabai digaga ari getai pelai tauka chuk ai kayu. Udah nya dijembi ngambika chuk nya jampat rangkai.

“Terabai tu ukai utai sengapa lalu iya bisi penti maya sida ngaga sereta ngukir bungai iya baka enda tau mayuh jaku, enda tau ditanya tauka dipadahka penama bungai ukir terabai sereta enda tau diperaka.

“Kebuah pia enggai ke orang ke ngaga, orang ke ngukir sereta orang ke meraka nya alah bulu tauka enda gayu. Pia mega enti nyema bini sida ti ngaga terabai tu ribat, sida enda tau ngukir terabai,” ku aya Sibat ngelansa penemu dikembuan diri.

Berindik ari nya, Ajat meransang mensia mayuh kelebih agi rebak baru ngulu kelas main asal, latih enggau bengkel ngaga keresa kitai bansa Dayak Iban ti diatur serakup nya nentuka pengawa tu enda lenyau diseruyut jeman.

Tanya enggau penerang silik pasal semua kelas main asal tauka sebarang rintai aktiviti sida tau telefon ngagai Ajat empu ba lumur 0128747342, Sekretari Nera (0138131387) enggau Fecy (0128846036).