Ngangkat, ngetan muzik asal Kenyah

KUCHING: Kelas Anak Sape Bungan ngiri pengelandik nebah Sape ungkup bala anak mit menua tu.

Kelas tu ngangkatka nama pengajar iya empu, Elizabeth Bungan ti tebilang nama sereta landik nebah Sape kelimpah suah nyereta pekit nebah Sape ba renggat entarabansa.

Pengeran ngajar bala anak mit ngambi landik nebah Sape ngasuh Elizabeth Bungan nyendiaka kelas belajar nebah Sape ngagai serap nembiak datai ari pupu bansa.

Bungan endang tampak rita, jelai nama laban seruran ngemegah nama menua sereta angkun ngetanka main asal enggau kereban muzik baka Sape enggau ke bukai.

Berebak enggau nya, iya ngajar rebak baru ngambi ulih nampung pengelandik sereta bisi juluk bekunsika penemu ngagai bala nembiak.

TEPERINDANG… Pengari ari Kelas Anak Sape Bungan merindang beserimbai enggau Gawai Dayak ba sebengkah palan besai bebelika barang ditu.

Iya diatu chakah ngatur kelas ungkup bala anak mit ti rinduka kereban muzik asal bansa Kenyah iya nya Sape.

Nya alai Bungan mungkal kelas nya kenyau ari taun siti nyin tadi lalu sekeda anak mit baru belajar taun tu.

Anak Sape Bungan tu digulu anak mit datai ari pupu bansa nyengkaum Iban, Melayu, Bidayuh, China enggau Melanau sereta ke bukai.

Kelas dipejalai dua renggat kena Hari Enam iya nya renggat keterubah berengkah ari pukul 9 ngagai 10 pagi enggau renggat kedua pukul 10 ngagai 11 pagi ba Union Learning Centre (ULC) ditu.

ANGKUNKA MAIN ASAL… Bala anak mit benung belajar nebah Sape lebuh nyereta Bengkel Nebah Sape ba Borneo 744.

Genap tubuh nembiak nyereta kelas nya dipinta mayar RM80 sebulan ungkup anak mit enggau RM120 sida tuai besai ke bela rindu belajar enggau ngansah pengelandik nebah Sape.

Nangkan nya ku Bungan, iya mega bisi nyendiaka Kelas Kediri ninting malam lalu diatu bisi empat iku anak mit enggau siku orang tuai besai ari menua China sama ngulu kelas nya.

Entara lagu diajar iya dalam kelas iya nya Datun Julud (lagu suah disada maya betanda ba rumah panjai), Leleng (disada lebuh ngelingi pangan diri), Pemung Jae ti mai reti seruran begulai, Hip Balip sebengkah lagu nandaka ati benung lelenggau, Pabat Pibui (lagu disada lebuh tawing begagai enggau pangan diri), Lan E enggau Lasan ti disada lebuh maya ngajat tauka dalam jaku Kenyah disebut saga.

Bungan deka ngajar sida chara nebah Sape nitihka tiun (code) enggau sada (vocal) lebuh nyadaka leka lagu nya sereta bala anak mit deka diajar lagu rayat kelebih agi lagu bansa Kenyah.

“Dikena ngerindang anak mit ngambi rinduka muzik tu, suah mega aku mai sida belajar ari luar kelas baka Pejalai Nemuai ngagai Kampung Budaya Sarawak lalu datai din sida ulih bekelala enggau pemain Sape kelimpah mendingka cherita tauka lansa pejalai ari peneleba dikunsi.

MERINDANG… Bala anak mit enggau Bungan begambar ungkup kenang pengudah merindang ba SCCS.

“Bala anak mit tu mega suah diasuh nyadaka lagu enggau nebah Sape ngagai mensia mayuh ba Taman Sahabat sereta begempuru bebala mayuh maya Gempuru Sape,” terang iya.

“Nambahka nya, sida mega kala merindang ba Gerempung Nembiak Sakit Riman Sarawak (SCCS) beserimbai enggau Pengerami Gawai Raya 2019, merindang ba Mini Showcase KMP (Kaban Muzik Production) ba The Summer Shopping Mall kena 28 April tu tadi,” lansa iya.

Sida mega bisi nyereta Sape Workshop pengelama dua hari rambau Sape Expo Borneo 744 begulai enggau raban At’Adau iya nya Saufi Aiman enggau Ezra. Seduai nya ngajar bala anak mit tiun tradisional enggau kontemperari.

Udah nya, bala Anak Sape Bungan kala nyereta Sape Workshop diatur Kampung Budaya Sarawak rambau Pengerami Gawai Dayak 2019 enggau nyereta Bengkel Nebah Sape ba Borneo 744 sereta Sape Recital begulai enggau Julient Cottet diatur ba Riverside Mall apin lama ke udah.

Bala anak mit dikaul beumur entara 7 taun nyentuk 13 taun. Sida ukai semina ngembuan pengelandik nebah Sape tang mega suah dikangau merindang mensia mayuh ba pengerami besai enggau bepekit.

NGUJI NASIP… Bala Anak Sape Bungan nyereta Pekit Sape Dunya ba Kampung Budaya Sarawak.

Entara penyereta kelas Anak Sape Bungan iya nya Aemylia, 12 taun, (Melayu), Brietta, 13 taun (Iban), Grace 12 taun (Iban), Gianna, 8 taun (penakan Bidayuh Melanau), Hubert, 10 taun (Iban), Benz Vincent, 8 taun (Iban), Benedict, 7 taun (Bidayuh) enggau Leah, 12 taun (penakan Iban China).

Ku Bungan, iya temegah ati lebuh terubah anak mit diembing mujur dikangat merindang keterubah ba Pengawa Nutup Hari Begulai enggau Mensia Mayuh diatur Kolej Rafflesia ba Unimas kena 14 April tu tadi.

Nangkan nya, sida mega suah dikangau merindang nyengkaum ba Pengerami Gawai Dayak kena 26 Mei tu tadi ba Giant Hypermarket Tabuan, Gempuru Besai Indu Misi Entarabansa ba Palan Aum Borneo Kuching (BCCK) kena 9 Ogos, dibasa ngelaluka penatai pengabang ba pengerami melah pinang sereta kala merindang dua kali ba Restaurant Budaya, Sarawak.

Bulan tu, Anak Sape Bungan deka nganjung pengari begulai enggau orkestra merindang ba sebengkah Pengerami Kids Talent kena 23 Oktober.

Singkang pemujur bala Anak Sape Bungan ukai semina naka nya aja tang nyingkang jauh agi nitihka pengemeran seni bukai.

Tu nyengkaum nyereta Pekit Sape Dunya 2019 nyerumba Gawai Dayak ba Kampung Budaya Sarawak kena 22 April tu tadi.

“Aku berasai temegah endar laban genap singkang enggau utai dikerindu bala anak endang disukung apai indai.

“Kebuah pia laban apai indai seruran ngemerat semua kereban nebah Sape sereta meri peransang kelimpah nangkup peminta bala anak.

“Bala Komuniti Sape mega seruran meri timbal positif ti ngasuh aku ransing agi ngiri penemu enggau ngansah penau sida nebah Sape awakka seni tu enda mudah lenyau ketegal segang pemansang dunya.

Anak Sape Bungan neladan Pengajar Bungan lalu deka Sape ulih diangkat ngagai renggat entarabansa.

“Bala anak mit ti diajar aku tu suah madah enggau ngembuan pengingin ati dekaka Sape ulih diterima dalam industri muzik sebaka enggau kereban muzik bukai menua lalu nyadi batang pengawa dudi hari,” ku iya nampung.

“Sida mega komited lebuh belajarka Sape ditambah enggau sukung apai indai meri peransang ngagai pemujur semua perambu enggau juluk kami.

Nya kebuah, Bungan meri besai terima kasih ngagai bala apai indai ti nadai belampung ati meri sukung ngagai bala anak sida.

Pia mega ngagai bala komuniti Sape, piak ULC enggau bala bakih ke bukai sereta pengatur program ti udah ngangauka kami merindang ngelama tu, tandu iya.

Bungan mega ngarapka bala anak mit tu ngembuan ati chukup liat, puh ngiri penemu sereta kih ngetanka seni asal bansa Kenyah sekalika ari sukut tium kontemporari tauka asal laban kitai bela enda ulih ngadang nama utai deka nyadi jemah.

Berebak enggau nya, Bungan meransang mayuh agi anak mit rejister nama laban ngulihka penemu enggau ngansah pengelandik nebah Sape laban ulah baka tu patut diterenak kenyau ari umur biak awakka sida ngasaika diri angkun sereta temegah enggau penatai asal diri.

“Aku berasai chukup gaga laban mujur ngatur Bengkel Anak Mit Nebah Sape ari Anak Sape Bungan laban tu endang juluk ati aku ti keran ngangkatka kereban muzik asal bansa Kenyah.

“Nambahka nya, aku bisi juluk ati ngagai sida ulih ngatur bengkel ngajar orang bukai lalu pekara tu nunjukka sida sedia nyingkang ke mua mantaika pengelandik diri empu.

Nya alai, aku ngarapka mensia mayuh, ejensi perintah enggau peribit ulih mantu pejalai kami nengah sukung tauka bantu ngambika pengelandik tu ulih dikerembai enggau diangkat baka kereban muzik ke bukai ba dunya.

Kitai begunaka sukung semua kelebih agi rebak nembiak ulih nampung juluk tu sereta besukung negika adat enggau main asal Orang Ulu.

Pengingin Bungan ukai semina deka nempa pemain Sape aja tang deka ngembing sida nyadi pengajar lalu nampung pengawa ti udah dirandang iya diatu nentuka pengelandik nya enda midang diserunyut arus pemansang dunya.

Suara Sarawak