ARTIKEL

JUYAYA

Lagu ‘Ngapung Laluh Aku’ terus trending

Facebook
Twitter
LinkedIn
WhatsApp
Telegram

JOM BACA E-PAPER SUARA SARAWAK/ NEW SARAWAK TRIBUNE PERCUMA SEAWAL 2 PAGI SETIAP HARI. KLIK SINI

PAMA utai disebut laluh, nemu-nemu aja meh kitai reti utai nya lalu ba jaku bukai laluh tu suah dikumbai kitai teda.

Enti ba sukut pemakai, laluh tauka teda tu mai reti pemakai ti ditampi kitai iya nya pemakai ti enda alah tauka enda abis diempa kitai.

Nya meh ti dikumbai kitai laluh tauka teda pemakai lalu tebal agi laluh pemakai tu deka dibuai sereta enda diguna agi.

Enti ba rumah panjai, tebal agi laluh pemakai ti udah ditampi enggau enda diguna kitai nya deka diberi ngagai jani ke pemakai sida.

ANANG NINDING

Seraya kitai bekenangka pasal laluh tu, aram kitai bekelala enggau siku penanyi Dayak ti tebilang enggau lagu Bara Api, iya nya Juyaya.

Nama asal penanyi bajik ti datai ari mengeri Kuching tu iya nya Julia anak Tawan, tang ba dunya pemerindang iya ngena nama glamour Juyaya.

Anak kedua ari tiga iku diri menyadi nya siku indu ti bejalaika pengawa dagang kelimpah rindu amat meda movie enggau drama ba Netflix.

Ba pun taun tu tadi, Juyaya mujur ngeluarka lagu baru diri ti pejuluk Ngapung Laluh Aku ti dikeluarka nengah chanel YouTube ‘Panggau Buluh Pengerindu’ (PBP).

Urung tiga bulan udah dikeluar, lagu nya mujur dipeda mensia mayuh ba penyuah nyau deka manggai sejuta kali enggau nerima kelai like lebih 6,800 iku orang.

Pemanah tiun enggau sada nyawa Juyaya maya nyadaka lagu nya ngasuh mensia mayuh, kelebih agi bala peminat lagu Dayak, rindu amat mendingka lagu nya.

Lebuh dirandau pasal lagu nya ti ditengkebang siku penanyi, komposer enggau Pemungkal PBP, Embat Lala, Juyaya madahka lagu nya ngenang pasal tembawai lama enggau sulu baru iya.

Nerang silik, ku iya, tembawai lama ngagai siku indu nguji ngemediska ati enggau ngasuh ex-sulu iya (indu nya) ninding.

“Maya ti bepansa, dia deh tembawai lama (ex-sulu) indu nya enggau sulu baru iya nguji ngemediska ati sereta ngasuh indu nya ninding meda pengauk seduai ti begulai.

“Tembawai lama indu nya enggau sulu baru iya ta sepenegar bepegai-pegai, bepayuk-payuk, beberap-berap, duduk berimbai lalu makai besuap-suap pangan diri ngambi indu nya ninding.

“Sigi digaga enggau diumbaka seduai ngambi indu nya pedis ati sereta ninding meda seduai ti begulai romatik nya.

“Opps…minta ampun meh…mimit pen nadai meh indu nya deka ninding tauka pedis ati meda ulah dua iku nya ti jejelah pendiau baka nya.

“Kapa enda iya ngempu lelaki pengindu baka nya… awakka indu nyin (sulu baru) ngapung laluh tauka teda indu nya tadi.

“Enda… mimit pen enda meh indu nya pedis ati meda ulah seduai bangat baka nya tang ngasuh iya geli ati ketawa meda indu nyin (sulu baru) ngapung laluh iya,” ku terang Juyaya silik.

Nangkan nya, penanyi bajik nya madahka nya semina lagu aja lalu nadai nyangkut-paut enggau pengidup iya.

Iya madahka diri idup lantang begulai enggau laki ti dikesayau iya enggau sida sebilik sereta bala bakih.

LAMBAR BARU

Ku lalau iya, enti pengerindu udah jelungan karam ba lubuk ati, nyurutka diri empu tauka ‘move on’ aja lalu badu agi ngenang pekara ti udah nyadi, kelantangka ati diri lalu giga meh orang bukai ti meruan agi nyadika ganti.

“Anang nyimpan dendam tauka benchi ngagai pangan diri tang nadai salah ga bekaban manah sereta enda ngasuh pangan diri ninding.

“Engka nya udah selatan diatur Petara enda ulih begulai sama tang lebuh bepansa nadai salah ga betanyaka berita.

“Jaga manah ati diri kelebih agi ati orang baru, anang ngemediska ati sida ketegal bisi chebik pengerindu ti lama.

“Genggam lalu diemparuka manah pengerindu tuchi enggau orang baru, bebasa sereta kelala meh ati budi pangan diri ngambi ulih idup lantang nyentuk jemah ila.

“Cherita lama enda patut dikenang agi, umbas! Tutup bup lama laban diatu kitai udah bisi cherita baru lalu kitai udah ngepunka lambar bup baru,” ku lalau iya.

NUNDA SINGKANG APAI

TERIMA KASIH… Juyaya begambar ungkup kenang enggau Pengajar Embat Lala rambau ngerikod lagu ba baruh perabung PBP.

Labang apai, labang anak. Nya meh sempama ti nemban dikena nyemaka minat Juyaya ba pengawa belagu.

Darah seni ti dikembuan Juyaya nya endang datai ari apai iya empu ti bela angkun enggau mekuhka pengawa belagu.

Ungkup penerang, apai iya siku penanyi veteran sereta ngembuan raban ‘band boy’ kediri empu rambau agi biak suba sereta suah dikangau merindang ba bemacham pengerami, program enggau Fun Fair.

Taja pia, diatu raban ‘band boy’ sida udah nadai agi laban sida nyau bela mai tunga kuing pengidup diri empu.

Terang penanyi beumur 27 taun nya, apai iya berengkah mekuh pengawa nya maya beumur 21 taun sereta angkun ngajar seduai menyadi, Monalissa Tawan, pengawa belagu.

Minat Juyaya ba pengawa belagu tu endang dikembuan iya ari mit rambau agi beumur lima taun.

“Apai siku orang ti minat amat ba pengawa belagu lalu berengkah ari agi mit suba nyentuk diatu, iya suah ngajar aku chara belagu.

“Pandak jaku, iya meh cheremin aku. Semina aku bedau tentu bisi pemerani enggau pengandal ati ngagai diri empu mandangka diri ba mua mensia mayuh.

“Taun 2021 besai amat reti ba aku laban nya meh keterubah aku nyingkangka kaki bejalai ba dunya pemerindang industri muzik Dayak tu.

“Semua nya bepun ari sebengkah pekit belagu online ti diatur Pengajar Embat Lala ti mega Pemungkal PBP,” ku tusui iya.

Entara lagu ti mujur dikeluarka Juyaya baka Udah Selatan Enda Begulai enggau Dara Enda Laku ti bepadu nyawa enggau penanyi Becka.

Udah nya, iya ngeluarka lagu Bara Api ti mujur nyaguka nama Juyaya ba dunya pemerindang Dayak nyentuk dikelala mensia mayuh.

Lagu bukai ti mujur dikeluarka iya baka Ranchak Hari Gawai, Gamal Baka Periuk Karan enggau Anang Regap-Regap sebedau ngetu enda lama ba industri muzik tu laban maya nya iya benung betubuh bisi sereta beribun anak mit.

Taja pia, ba taun 2024 tu, iya pansut baru enggau lagu Anang Pama, Ngapung Laluh Aku lalu nyerumba pengerami Gawai ti deka datai tu, iya bisi ngeluarka lagu Semun Ngintu Gawai.

Seraya nusui pasal minat diri ba pengawa belagu, ku iya, berengkah ari umur lima taun iya udah ngembuan minat ba pengawa nya.

Iya madah, maya nya suba iya semina minat belagu aja tang nadai mansa ba runding iya deka begelar siku penanyi.

“Semua nya bepun maya umur aku manggai 24 taun. Aku nguji meranika diri masuk pekit belagu online ti diatur PBP lalu nya mujur ngerandang jalai aku tepejuh ba dunya pemerindang Dayak tu.

“Sebedau nya, aku mega suah masuk bemacham pekit belagu ti bisi diatur berengkah ari umur aku 12 taun suba sereta suah bulih penuduk ba pekit nya.

TERUS BELAJAR

MAJAK DIKERINDU… Lagu baru Juyaya ti pejuluk Ngapung Laluh Aku ‘trending’ ba YouTube enggau dipeda mensia mayuh urung sejuta kali.


Taja pen suah napi penguji ba dunya pemerindang Dayak, tang nya enda nanggul Juyaya neruska minat diri ba pengawa belagu enggau merindang bala peminat.

Kenu ku iya, sekeda ari penguji ditapi iya baka suah nerima jaku pejah ari mensia mayuh ti nguji deka ngelabuhka iya.

“Aku beterima kasih laban jaku pejah nya meh meri aku pengering tauka semangat terus ngerembaika sayap diri ba industri tu.

“Dunya pemerindang endang penuh enggau penguji tang aku patut pintar enggau liat ati napi semua nya.

“Enti kitai enda puh napi penguji dia kitai enda ulih beretan lama ba industri tu.

“Kelimpah ari nya, aku agi malu, jampat kesal enggau bedau ngembuan pengandal ati besai ngagai diri empu merindang ba mua bala mayuh.

“Aku agi belajar nelebaka diri enggau dunya pemerindang tu sereta berani merindang bala peminat ba sebarang endur enggau ngeluarka mayuh agi lagu dudi hari,” ku Juyaya.

Nangkan nya, iya madahka industri muzik Dayak kemaya hari jauh udah nyulut nunda singkang industri muzik menua luar.

Ku iya, nya endang siti berita manah sereta ngarap industri muzik kitai terus mansang ke mua nyapai bemacham penyulut besai.

Rebak biak ti deka ngerichahka agi industri muzik kitai, ku iya, patut nyikap diri ngena mayuh penemu pasal muzik, belajar ari artis tebangkar enggau chakah masuk pekit belagu ngambi ngelala pengelemi diri.

Dikena ngujungka randau diri, Juyaya meri besai terima kasih ngagai semua orang ti nyukung sereta besampika pemujur iya kelebih agi bala peminat, sida sebilik, bala bakih sereta bakih sama industri.

“Aku mega meri terima kasih ngagai apai indai enggau laki ti dikesayau ti semampai bisi maya tusah enggau senang sereta meri sukung tegut ngagai aku.

“Terima kasih mayuh-mayuh ngagai kita semua. Enti nadai kita semua, sapa meh aku? Penyulut diulih aku ba pengawa tu semua nya berekat ari sukung kita semua,” ku iya seraya mantaika pengaga ati diri.

Kelimpah merindang bala peminat, Juyaya mega chakah bejalaika dagang diri empu ti diberi nama Bajik Enterprise sereta nyual bemacham bansa kantung, jam enggau produk bukai ungkup raban lelaki enggau indu.

BERITA LAIN

BERITA TERBARU