Ngepan lelaki ngading Bujang Berani

BETONG: Mayuh macham kereban pekayan bujang berani kitai Iban ti ditempa ari kain kebat enggau tenun, bulu burung, wi danan, kerutuk pala enggau taring jelu, buah pelaga enggau pirak sereta mayuh ke bukai.

Ku Chairman Kelab Ngepan Betong (KNB) Tajem Sinok, 43 taun, bisi lima kereban pekayan lelaki enda tau enda bisi, pun gari sida ke lelaki lebuh nurun ngayau kelia, kelimpah ari kereban ngading bukai.

Lanjang

Ku Tajem, ngepan asal lelaki ke dikena ba pala dikumbai kitai lanjang lalu bisi sebengkah perengka ba lanjang ke dikumbai ketapu.

“Ketapu nya digaga ari wi ti dianyam lalu chura iya nitihka peneka diri empu. Udah wi tembu dianyam sereta dichat, iya digelar kitai ketapu sereta bisi mega ketapu dianyam sereta dichat nunda chura burung kenyalang.

LANJANG… Pengelebat bulu buruang ruai diujak ba lanjang mandangka pemisi diri.

“Udah ketapu tembu dianyam sereta dichat, sida ke landik ngaga perengka tu ngujakka bulu burung ba ketapu nya ti suah agi diambi ari bulu burung ruai enggau kenyalang.

“Pengelebat bulu burung ti diujak ba ketapu nya nitihka penemu siku-siku orang ti ngaga iya. Makin lebat bulu nya diujakka, makin manah iya dipeda. Tu dikumbai kitai lanjang,” ku Tajem.

Nangkan nya ku Tajem, enti kitai meratika siti-siti bansa ngepan lelaki, enti lelaki nya ngena baju burung, bulu burung ba lanjang iya enda tentu lebat tang enti ngena gagung, lanjang sida diujak enggau bulu burung ti lebat.

“Nyangka nitihka pemisi kereban asal dikembuan sida, sekalika nya kereban ditinggalka orang tuai sida enggau ari pemisi sida empu laban perengka tu pedis amat digiga diatu.

“Kala mega ninga sida ke tuai nyebut, bisi penti enti deka ngaga lanjang tang sekeda madah nadai penti pemali.

GAGUNG… Digaga ari kulit jelu dilagu ngena taring enggau manik

“Semua utai tu nyangka nitihka penau diri empu. Lanjang tu mega ukai sengapa main enti tuju iya kena pengawa berat.

“Taja pia, enti lanjang tu sigi digaga kena berami sereta bisi pengawa lantang, lanjang tu ulih dikena bebuti lalu bemain.

“Ambika chunto, maya kitai matak orang ngajat ngelinggi ranyai, kitai ngena lanjang ti tau uti.

“Tang enti lanjang dikena orang ngayau, kitai enda tau bebuti tauka dikena begagai,” ku Tajem madah nyemetak.

Gagung

BAJU BURUNG… Digaga ari kaun ti ditenun, dijait nitihka langkar tubuh.

Gagung sebengkah baju ti digaga ari kulit jelu siga dikena aki kitai kelia lebuh nurun ngayau mulau menua, ngulu pengerami besai sereta pengawa begawai bukai, ku Tajem.

“Gagung enda tau dikena ninting hari tauka dikena orang sengapa laban nitih ku jaku sida ke tuai, semina orang ke deka nurun ngayau, orang ti kering, berani sereta tampak nama aja tau ngerasuk iya.

“Nitihka cherita tuai, bala munsuh takut deka ngelaban enti meda bala Iban bekenaka Gagung.”

Gagung suah agi digaga ari bulu tauka kulit jelu siga baka jelu jugam ti mar diulih laban jelu tu kering sereta mangah.

“Kelia menya, sida ke ngembuan Gagung tu dikumbai orang berani kempang sereta bisi pengaruh bisa.

SIRAT… Dikena ba punggung lalu nutup ke baruh pah, disanggitka duit, ditusuk manik nitihka chura enggau bungai lalu bisi burai buah pelaga enggau gerunung ba ujung sirat.

“Kelimpah ari nya, ngepan tu disempulang enggau taring jani ke berantu, ngembuan pengaruh bebunuh sereta dinding bulu,” ku Tajem ngelansa.

Bida Gagung enggau Baju Burung

Ku iya, mayuh orang enda nemu bida entara Gagung enggau baju burung.

Baju burung tu mega siti ari perengka pekayan asal sida ke lelaki ti suah agi dikena maya ngintu pengerami bukai enggau dikena nyambut temuai datai tauka maya ngajat.

Enti Gagung tu tadi kena orang ngayau sereta begawai sepengudah iya bulih dengah tauka pala munsuh.

TERABAI… Kayu kering, teguh enggau tan lama baka tebelian suah digagaka terabai, ngetanka diri ari munsuh.

“Taja pia, baju burung ti bisi ukir antu pala iya nya baju burung ti dikena bala lelaki nurun ngayau, suah agi bechura mansau terang.

“Baju burung ditenun ngena chara sungkit sereta asil iya alus agi. Motif baju burung nyauka sebaka enggau motif pua kumbu, tang suah agi ngena motif mensia.

“Ubung chura emas dikena sida nyungkit kain dikena ngaga baju burung lalu iya digaga sigi engkeman enggau tubuh orang ke ngempu baju,” terang Tajem, peranak Selanjan Sebemban, Lachau Sri Aman.

Sirat

GENAP… Tajem (tiga kanan) ngerasuk genap kereban ngepan lelaki disempulang bala kaban KNB bukai.

Sirat kereban ngepan sida ke lelaki dikena ba punggung lalu nutup ke baruh pah. Kelia menya, orang lelaki endang nadai betanchut tang semina besirat aja.

“Sirat tu ukai semina dikena nurun ngayau, ngereja pengawa lama tauka maya begawai aja tang maya ngereja pengawa besehari sehari sida ke lelaki pan ngena sirat.

“Enti kelia, kitai udu ngiga asil babas dikena ngaga baju, kain enggau sirat. Ambika chunto, kulit temeran ari kayu tekalung ti ditenchang dataika iya alus besabut dikena ngaga sirat tauka baju tekalung.

“Kain ti nyadika sirat sida ke laki baka kain pua kumbu. Bisi mega sida ke lelaki ngena kain buri. Enti sema sida ngena kain pua kumbu nyadika sirat ti patut bechura mansau.

“Bungai tauka motif pua kumbu nya tadi bechura burak. Pua kumbu ti ditenun endang enda tau sengapa. Chura sirat mega enda sengapa digaga orang. Enti kelia, sirat mansau tauka sirat seram endang dikena orang begawai sereta nurun ngayau,” ku iya.

GAP… Tajem (dua kanan) begulai enggau bala kaban KNB bukai lebuh ngulu pengawa besai.

Bisi mega orang ngaga sirat ngena kain chelum, udahnya diujung kain nya mua ke kiba enggau kanan dilagu orang ngena manik, kerubung tekuyung mit sereta gerunong.

Chura chelum suah agi dikena sida ke laki maya bisi penusah baka pemati. Taja sida bujang berani, sida enda tau ngena sirat mirah tauka resam lebuh ngintu penusah nya.

“Sida ti betenun pua kumbu endang besampi tauka miring dulu sebedau nenun. Perengka ti dikena ngaga pua kumbu iya nya pemalu taya kena malu kapas, taya digaga nyadika ubung sereta akar engkudu, buah tajau tauka akar sebangki digaga nyadika chuk, tembu ditenun, iya tau dijadika sirat sida lelaki.

“Pemanjai sirat sida ke laki jauh ngeluie ari patung tang enda datai di kaki. Sirat tu dikena ba punggung dibelit ke baruh kangkang ari pah sida ke lelaki.

Sirat tu suah agi digaga orang segi tiga lalu ujung kain dijuntaika orang ba belakang sereta ba mua punggung. Ujung kain ti dilagu orang ngena manik, kerubung tekuyung sereta gerunong tadi dibantaika maya sida laki diperaduka ngena sirat,” ku iya nerang silik.

Terabai

Nangkan nya ku Tajem, perengka Iban ke asal agi ulih dipeda kitai diatu iya nya terabai, perengka perang kitai Iban.

“Terabai tu suah agi dikena sida bujang kering berani ngayau, bebunuh, kayau anak sereta ngetanka menua ari munsuh.

“Tang terabai mega ulih dikena maya ngajat Bujang Berani sereta ngajat Bebunuh. Terabai ke digaga sigi besai, ulih disema enggau pemesai sereta baruh mimit ari mensia,” lansa iya.

Terabai tu digaga ari kayu ti pemadu kering, teguh sereta tan baka kayu tebelian, entenong, bandir tapang, kerangan batu, kayu mengering sereta empuas.

Orang ke tau ngaga terabai tu ukai orang sengapa lalu sida ti bisi pemendar ari Petara, semina bujang berani ti kala bedengah tauka bulih pala munsuh.

“Bungai ukir ti suah dikena ngukir terabai iya nya Tungaka Matahari Padam sereta Ngerejang Kalimantan Indonesia. Bisi mega orang ngukir bungai terabai tu dichuan ari kenyap, chura mua jelu sereta antu.

“Terabai diukir ngena lungga, batu sereta getah kayu. Chura terabai digaga ari getai pelai tauka chuk ai kayu. Udah nya dijembi ngambika chuk nya jampat rangkai.

“Terabai tu ukai utai sengapa lalu iya bisi penti maya sida ngaga sereta ngukir bungai iya. Penti ngaga terabai tu iya nya enda tau mayuh jaku, enda tau ditanya tauka dipadahka penama bungai ukir terabai sereta enda tau diperaka.

“Kebuah pia enggai ke orang ke ngaga, orang ke ngukir sereta orang ke meraka nya alah bulu tauka enda gayu. Pia mega enti nyema bini sida ti ngaga terabai tu ribat, sida enda tau ngukir terabai tu,” ku iya madah nyemetak.

Senyata

Perengka ngepan lelaki Iban enda genap enti sida nadai bepegaika senyata, ku Tajem nampung.

Senyata tu mih nyadika tenggau maya sida nurun belelang, begigaka jelu sereta ngayau.

“Lelaki Iban endang dibekalka apai indai sida iya enggau senyata ti nyema sida udah angkat bujang.

“Tu mih utai dikena ngelatih sida awakka nyadi bujang berani, ulih ngetan ke menua sereta tampak berita.

“Senyata tu mayuh macham bengkah lalu emua senyata tu endang digaga, ditempa ari jari sida ti landik,” terang iya.

Sebengkah ari senyata ti sigi bisi dikembuan siku-siku lelaki Iban iya nya Ilang enggau nyabor.

Ilang enggau nyabor deka sebaka semina nyabor tu pandak agi ari ilang tang mata nyabor besai agi. Nyabor tu sigi dikembuan sida ke lelaki kelebih agi sida ti orang kayau.

“Ba ulu nyabor selalu bisi diengkahka sida bulu buk. Bulu buk tu nandaka nyabor nya kala dikena ngayau sereta udah bisi dengah. Bulu buk nya mega tanda sida lelaki ti ngempu nya tampak berita sereta tampak kayau. Bulu buk ti diengkah orang ba ulu nyabor dikumbai kitai jambur tauka jabang nyabor.

“Pemegai nyabor nya bisi ukir lalu ukai ukir ti digaga sengapa lalu Nyabor ke kala dikena ngayau sigi digenselan orang belama baka bebunuhka babi sereta diberi piring.

“Nitihka cherita, duku kayau ke kala bedengah ulih kena ngubat anak mit sakit gelata sereta anak mit ti tengik udu nyabak. Ilang enggau nyabor ti udah kena ngayau enda tau disintak maya bini sida ribat,” simpul kenang Tajem lebuh dirandau Suara Sarawak.

Suara Sarawak