KUCHING: Rayat Malaysia meseti ngetanka penyerakup ba menua tu ngambi ulah bebasaka pangan diri terus dijaga meruan.

Kaban Kunsil Nengeri (ADUN) Tamin, Christopher Gira madahka diri meri terima kasih besai ngaga raban tuai suba ti udah bebendar mantu numbuhka Malaysia.

“Taja pen kitai ba Malaysia diuan bemacham pupu bansa enggau bebida pengarap tang kitai idup likun sereta lantang laban kitai bela bebasaka pangan diri.

“Nya alai, utai tu meseti ditanka kitai,” ku iya lebuh ditanya Suara Sarawak serimbai pengarap iya ngagai Hari Malaysia.

Iya mega beterima kasih ngagai Perintah Besai ti udah meri agih belanja ngagai Perintah Sarawak dikena ngemansangka menua tu baka pengawa ngaga jalai alun.

“Pia mega pemansang bukai baka ngaga sekula, sepital, klinik, bekal ai enggau kuasa karan sereta perengkaguna bukai ba mengeri enggau ba menua pesisir ti udah tembu, benung digaga enggau deka digaga.

“Perintah Sarawak mega betuah laban diiring Premier Sarawak, Datuk Patinggi Tan Sri Abang Johari Tun Openg mai menua tu lantang sereta likun dalam Malaysia.

“Kitai ngembuan juluk ati deka nyadi nengeri maju ba taun 2030, deka ngeranchakka agi pemansang ba menua pesisir.

“Nya alai, aku andal Sarawak terus likun ngambi sukung kitai ulih mantu nyapai juluk ati ti dikedeka Perintah Sarawak,” ku iya.