Ngiling Bidai SIB Adonai richah

BETONG: Sepenyampau 149 kaban Gerija Sidang Injil Borneo (SIB) Adonai ngerichahka pengerami Ngiling Bidai renggat gerija apin lama ke udah.

Pengerami tu diatur raban nembiak gerija nya ti diembing ketuai sida, Lydya Senorita Linang.

Macham aktiviti diatur baka ngerebah ranyai enggau ngiling tikai kelai Gawai Dayak tembu diintu taun tu.

Chairman Pemansang Gerija Henry Jugah madahka diri temegah meda pemanah timbal ari bala kaban gerija.

“Aku meri terima kasih ngagai semua laban ulih ngelimpangka awak diri begulai berami enggau ngerichahka pengerami tu.

PUN RANYAI… Pastor Ningkan begulai enggau bala bukai ngerebah ranyai.

“Pemayuh tubuh bala ti datai, bisi sekeda duduk ba geladak aja laban enda chukup bangku ngayanka sukung kita ngagai aktiviti gerija majak nambah,” ku iya pengudah tembu pengerami.

Berebak enggau nya Henry ngelalu penatai peranak ari rumah panjai di Penebak Ulu, Nanga Penebak, Jambu Kerampak, Tanu, Tansang, Serian Ili, Passa Baroh, Skim Skrang, Tisak Ulu, Kaong Skrang enggau ngilingi Pasar Betong.

Iya ngarapka program baka tu ulih nyadi pelasar ngerapit pemanah kaul entara sida.

Ba lansa bukai, Pastor Ningkan Limban madahka sida sedia nyendiaka palan besai agi laban tubuh bala kaban gerija majak nambah sereta meri tabi puji ari berekat Tuhan nya.

Sama datai Ketuai Gerija SIB Adonai Betong Sunggom Watt enggau sapit iya, Buntoi Munan.