NGO raban indu patut terus disukung

SARATOK: Genap gerempung ukai dikuasa perintah (NGO) ngaul raban indu endang ngembuan tanggung pengawa besai.

Sapit Menteri Pengeluar Kuasa enggau Pengeraja Asal, Datuk Ali Biju madahka pemujur menua ditempa ari pemansang ruang bilik ti dikuasa raban indu.

Ku iya, pangku pengawa orang indu ngemansangka ruang bilik enggau komuniti beguna amat lalu tau dikumbai kitai nyadi tiang pandung pemansang menua.

“Orang indu kemaya hari ukai baka suba, diau ba rumah ngintu ruang bilik aja. Sida diatu nyau mangku pengawa besai, nyadi tuai lalu bisi nyadi pedagang tikas entarabansa.

“Nya alai kitai patut meri peransang ngagai raban indu ari renggat tumu dalam komuniti, meransang sida tu ngereja pengawa ti pulaika pemaik ngagai semua,” ku iya ti mega Kaban Parlimen Saratok.

Jaku Ali nya dikenataika Rosita Drazak, Pegawai Palan Servis Komuniti Sitak Parlimen Saratok lebuh ngarika iya nyuaka chek Projek Mit Pemansang Menua Pesisir (MRP) ngagai Serakup Raban Indu Sarawak (PPWS) ungkup sitak Kabong ditu.

Iya nyemetak madah, MRP nya sebagi ari pengawa ti mandangka sukung enggau ngenang pemesai tanggung pengawa raban indu, nyaup sida bejalaika pengawa pemansang dalam komuniti.

Berebak enggau nya, empat PPWS bela nerima chek RM5,000 ngambika bisi dikena sida bejalaika sebarang program nyerumba bulan Ramadan enggau maya ngintu Hari Raya ila.

Datai nerima chek sehari nya Rohani Mit ngarika PPWS Kampung Hilir, Nurain Abdullah ari PPWS Kampung Sungai Endot, Salehah Golong PPWS Kampung Darat Baru seraya PPWS Kampung Hulu diarika Hamdiah Mohamad.

Suara Sarawak