TUSUN 8
SIDA nembiak ba Rumah Entekung di Tanjong Batu Besundang nya baka orang menua bukai mega, udah ngelala pemesai guna sekula laban sida meda gaya penguntung enggau pemansang orang ke udah nemu surat.
Nya alai sida ke tuai di rumah nya, ensepi diri merinsa nadai penemu, ari nya sida enggai enda ngasuh anak diri belajar ke surat lalu nemu nulis enggau macha.
Sekula sida di rumah nya bisi kira setaun udah didirika, nya alai meda sekula diri nyau deka chukup taun, ari nya bala tuai enggau komiti sekula sida berunding deka muka lumba enggau main bukai dikena ngerami sekula nya.
Aum sida mujur bendar laban semua atur lumba enggau sekeda main bukai nya endang dipanggaika sida ngagai komiti sekula laban nya orang ke tanggung ngaduka atur pengerami nya.
Aum udah putus.
Maya ke muka pengerami nya pen udah diletak.
Main ke dibuka rambau nya nyengkaum lumba darat ka nembiak sekula enggau lumba apai indai nembiak, lumba orang ke indu, main bol, nyabung, bepekit ke pemajik indu dara enggau bebatak tali.
Ripih main sesebengkah endang udah diaduka komiti semua. Hari ke nyadi nya seminggu udah aum nya diputus.
Sida ke muka pengerami nya bisi ngambi orang rumah bukai lalu bisi mega ngambi orang ari Kubau di ili.
Nya alai datai ba timpuh, orang ke diambi pen datai. Tang bala orang ke ari Kubau datai sehari dulu ari timpuh nya nyadi.
Sereta bala orang ari Kubau nya udah datai, dia Tuai Rumah Entekung lalu mai sida merarau ba bilik iya.
Tembu makai nya, iya bejaku enggau sida.
“Kami sebuat ditu sama agi baru magang pasal pengawa ngerami sekula tu laban endang nadai kala ngereja pengawa baka tu ngelama tu.
“Tang laban empa pengeras ati ngemansang ke sekula, nya alai muka pengerami kena meransang ati apai indai enggau nembiak ke besekula ditu.
“Tang sebengkah utai ke ngasuh ati irau laban sida ke nyadi komiti sekula kami tu orang baru magang, nadai udah ngereja pengawa ke bansa tu.
“Sida amat mega udah baum lalu atur udah diadu ka sida tang ati aku enda tetap meda atur sida.
Nya alai ngasuh kita ke datai ari ili tu mungkar atur sida lalu ngaduka atur tu baru,” pia ku Tuai Rumah Entekung. Sida ke datai ari ili pen enda betangguh lalu mungkar atur komiti sekula nya.
Semua atur diaduka komiti dibuai magang.
Meda baka nya, komiti sekula sida nya nanya Entekung, nanya ke kebuah iya ngasuh sida ke datai ari ili nya ngubah semua atur ke udah diadu ka sida.
“Kebuah aku ngasuh sida ke datai ari ili nyin ngadu ka atur ke udah diadu ka kita laban sida orang perintah, nya alai sida tentu nemu ngadu ka atur ka manah agi,” pia ku saut Tuai Rumah Entekung.
“Enti munyi nya, nadai guna meh ngasuh kami tu nyadi komiti enti atur kami enda diguna.
Kami nyadi komiti tu, ukai utai pinta kami empu, endang diasuh kita mayuh, endang utai dipilih.
“Nyadi jaku kita suba, semua atur pasal sekula tu endang bepanggai ba kami ke nyadi komiti.
Tang baru deka muka pengerami dalam sekula tu, kita ke tuai lalu enda beguna ke atur kami.
Nya alai ngambi ka jaku tu pandak kami ke nyadi komiti tu enda agi megai pengawa tu ngambi orang ari Kubau ili ai nyin nyadi komiti sekula kitai tu,” pia ku komiti sekula.
“Enggai nyadi penemu kita munyi tu. Enda nyadi pengerami kitai, enti penemu charut baka tu,” pia ku Entekung.
“Kami komiti tu nadai nyarutka pengawa tu tang nuan ke ngasuh orang ari ili nyin ngubah atur ke udah diadu ka kami.
“Laban naka utai ke disebut dalam aum ti berundingka pengerami tu suba, kebuah kitai ke ngambi sida ari Kubau nyin datai ngagai pengerami tu endang ngambi sida ngabang ngemataka pengerami kitai.
“Ukai ngasuh sida ngatur tauka ngubah utai ke udah diaduka komiti.
Tang nuan ngasuh sida ngubah atur kami ari belakang, nadai madah ngagai kami.
“Nya alai kami komiti tu enda megai tanggung atur tu agi. Ngambi ka sida ari Kubau nyin nganti kami,” pia ku sida ke nyadi komiti sekula di Tanjong Batu Besundang nya.
Udah bekau bejaku nya, sida komiti nya tadi endang enda ibuh ke pengerami nya agi. Bisi sida nebas ke kebun, sekeda sida turun ke umai.
Tawas pagi siti, datai ba timpuh pengerami ti patut nyadi, dia orang ke ngulu pengerami nya lalu nurun ka padang.
Bala nembiak sekula udah sedia magang. Orang ke nyabung udah mai manuk deka disabung.
Datai di padang meda sida ke nyadi komiti sekula nya nadai dia.
Pengawa ke udah diatur sida lalu enda dikereja.
Tuai Rumah Entekung lalu mai orang ke datai ari ili nya mansang ka padang.
Datai dia orang bejaku enggau Entekung, nanya ka penunga sida ke nyadi komiti.
Apin nyaut jaku nya, dia Entekung lalu madahka sida ti datai ari kubau nya diasuh iya ngubah atur ke udah diaduka komiti sekula sida laban atur komiti nya agi salah kenu ku iya.
