Niang Ahmad Lai siku ketuai ti manah enggau begulai

KUCHING: Pemidang niang ex-kaban parlimen Sibuti Datuk Ahmad Lai Bujang siti pengelenyau ti chukup besai, ku Menteri Dagang Temuai, Seni, Main Asal, Nembiak enggau Lumba Datuk Abdul Karim Rahman Hamzah.

Ku iya, pengelenyau nya ukai semina diasaika Sarawak tang mega Parti Pesaka Bumiputera Bersatu (PBB) alai niang mega siku ari raban parti nya.

“Aku udah lama ngelala enggau niang sereta kaul kami duai endang semak.

“Aku empu tekenyit lebuh ninga rita niang udah ngejang ninggalka kitai pagi tadi,” ku iya lebuh dirandau raban pemberita pengudah Pengerami Nyerahka Begunan Komples Muzium Sarawak ditu, tadi.

Nangkan nya ku Abdul Karim, sepemanjai gawa sereta ngelala niang Ahmad Lai, niang enda siku orang ti chukup manah enggau begulai.

“Sepemanjai begulai sereta gawa, niang nadai kala bisi kontroversi sereta rajin ngereja pengawa iya.

“Lalu penudi iya aku betemu enggau niang lebuh Taun Baru China taun tu tadi, berapa bulan ti udah,” ku iya madah.

Abdul Karim mega mantaika penyinu ati sereta ngarapka sida niang sebilik kering ati nempuh pengujinnya.

Niang Datuk Ahmad Lai Bujang, 69 taun nadai urung jam 5.32 pagi tadi ba Instistut Jantung Kuala Lumpur.

Nitihka penerang ari sida sebilik, niang dibai ke Miri sehari tu lalu dikuburka ba Pendam Islam Baluboh, Miri.

Ahmad Lai ada kena 26 November 1949 lalu bediri minta pilih ba Pengawa Bepilih Besai (PRU) 2008 ngarika PBB sereta mujur ngalahka Michael Teo Yu Keng ari PKR pengudah mujur bulih 8,238 undi (64 peratus).

Ba PRU 2013, Ahmad Lai sekali agi memang bediri ba penuduk nya pengudah bulih 65 peratus undi.

PRU 2018, niang nadai enggau pengawa bepilih lalu meri awak ngagai Lukanisman Awang Sauni ti mujur ngalahka chalun PKR Jemat Panjang enggau chalun PAS, Zulaihi Bakar.

Sepemanjai pengidup iya, niang endang dikelala ngena juluk pemesai politik ti semak enggau rayat sereta mayuh mantu rayat ba menua dipegai iya.

MERI PENYINU ATI… Karim madahka niang Ahmad Lai siku ketuai politik ti chukup manah sereta nadai kontroversi sepemanjai gawa ke Sarawak.