KUCHING: Kaban Parlimen Kapit, Datuk Seri Alexander Nanta Linggi ngasaika niang Datuk Seri Ambrose Blikau Enturan udah mayuh jasa ngemansang sitak menua pesisir ba timpuh iya nyadi ADUN Katibas.
Nya kebuah, Nanta ke mega Menteri Kereja Rayat madah, ukai semina sida sebilik ti berasai puang tang menua semua peranak ba sitak DUN Katibas sinu ngenang pemidang niang.
“Aram kitai besampika semengat niang lantang ba menua baru.
“Jasa niang ngelama tu meruan dikenang kitai lalu jaku peransang iya nyadi lalau kitai nyingkang jauh agi,” ku Nanta.
Nanta mega meri penyinu ati ngagai bini niang, Datin Sri Marie Therese Mathias sereta sida sebilik.
“Aku ngarika semua peranak ba sitak Parlimen Kapit besampika sida niang sebilik sabar nempuh penguji besai tu,” ku iya.
