KUCHING: Premier Sarawak Datuk Patinggi Tan Sri Abang Johari Tun Openg madah ke niang Datuk Talib Zulpilip nya ngembuan integriti maya bejalaika pangku pengawa ti diberi.
Ku iya, Kaban Kunsil Nengeri (ADUN) Jepak nya mega siku tuai ti chukup bagas enggau ransing bejalaika tanggung pengawa dilempai ngagai tandan bau iya. “Pemidang niang siti pengelenyau besai ngagai Sarawak,” ku iya lebuh dirandau rambau pengawa nganjung niang ADUN Jepak ditu, malam ensanus.
Nambah ke nya, Abang Johari mega madah ke niang Talib siku tuai ti negika pengawa munas penyalah makai suap enggau tokoh besai di Sarawak. Ari nya ku iya, niang udah dilempaika pengandal mangku portfolio nyadi Menteri di Opis Kepala Menteri Sarawak (Integriti enggau Ombudsman) ti keterubah dalam taun 2017.
“Kitai ngelempaika pangku pengawa tu ngagai iya ngetuaika sistem ombudsman di nengeri tu laban integriti dikembuan niang,” terang iya. Ngenang pekara bukai, Abang Johari mega bisi bekenangka jasa niang Talib kelebih agi ba pemansang dipejalai di Bintulu.
“Tu nyengkaum sadang penemu iya numbuhka Jepak Jaya ba Bagi Menua Bintulu nengah Kaunsil Pemansang Bintulu (BDA),” ku iya.
Berindik ari nya, Abang Johari meri penyinu ati ngagai sida niang Talib sebilik ngarika perintah enggau Parti Pesaka Bumiputera Bersatu (PBB). Ungkup penerang, niang ninggalka bini, Datin Dr Zaliha Abdullah, empat anak enggau empat uchu.
