Nicholas badu ketegal asa MA63 enda dikeamat, ketuai dibuai nadai kebuah

KUCHING: Kaban komiti Parti Keadilan Rakyat (PKR) Lubok Antu ngenukuka Ketuai Pampang iya, Nicholas Bawin udah ngemaduka diri mangku pengawa ba parti nya.

Nengah sebengkah penerang, Nicholas Bawin ngemaduka diri mangku pengawa nyadi Chairman Bagi Menua P.203 Lubok Antu kenyau ari taun 2009, Kaunsil Supreme Nengeri (MPN-Komiti Nengeri) kenyau ari taun 2009 enggau Sapit Chairman MPN Sarawak kenyau ari taun 2018.

Pekara tu ukai mudah dibantaika komiti, baka Nicholas Bawin nya kaban Ketuai Pampang Lubok Antu enggau udah nyadi tiang sukung enggau ketuai pampang nya kenyau ari parti tu ditumbuh.

Nicholas madahka iya ngemaduka diri nitihka polisi otonomi dalam parti seriris enggau Sempekat Malaysia 1963 (MA63) ti enda dikeamat enggau enda dipejalai.

Pia mega, iya ngemaduka diri mega laban nyukung ketuai enggau kaban ti dibuai apin lama enggau nadai kebuah.

Lebuh Nicholas Bawin ngemaduka diri mangku pengawa dalam parti nya ukai pekara ti mit laban tu ulih meri pangka ngagai komuniti renggat baruh ba Lubok Antu enggau raban bansa Iban ba Sarawak.

Nya alai, PKR Lubok Antu deka baum ngambika berundingka pekara ke patut dikereja sida udah tu.

Suara Sarawak