Ninting taun merinsa kena ampuh bah

KUCHING: “Ninting taun rumah kami ngasaika pemerinsa ketegal dituntung penusah ampuh bah kekadang sampai maras punggung,” ku Ng Thien Poh, 59 taun pengempu rumah ke diseruri kemari.

Thien Poh ngibun apai enggau indai iya ba rumah nya kenyau 35 taun ke udah lalu.

“Aku ngibun apai enggau indai aku ba rumah tu laban seduai udah tuai.

“Apai aku masuk sepital tiga hari ke udah laban bisi penanggul ba lempuang,” ku iya lebuh ditanya pemberita ditu, kemari.

Thien Poh ke gawa nyadi siku penganda ubat tradisional China madahka rumah lama sida balat rusak laban perabung rumah bisi tuduh.

“Belanja ti diulih aku enda chukup dikena nupi kami sebilik laban apai aku suah sakit.

“Lebuh maya bah, mayuh barang rusak baka barang dapur, palan nyumai enggau agu.

“Diatu, ati aku berasai lantang laban udah dibantu sebuah rumah baru ti ulih endur kami sebilik ngenduh,” ku iya.

Thien Poh ngembuan empat iku anak lalu iya anak lumur dua ari enam iku diri menyadi.

Rumah baru Thien Poh ngembuan dua buah bilik tinduk, siti bilik besai enggau disikap palan nyumai.

Suara Sarawak