NADAI siku orang ngajihka nasip diri nyadi indai tunggal laban udah tentu sida ngarap ruang bilik diri meruan nyentuk jemah.
Taja pia, kisah pengidup genap iku orang enda sebaka lalu semua pekara ti nyadi nya endang udah diatur Petara magang.
ANGKAT NGEMANSANGKA DIRI
Nya alai, Noreeny Manggie ti kala masuk Pekit Queen of the World (QOTW) Sarawak ngelalau bala indai tunggal ngambi ransing ngemansangka diri empu lalu enda bepanggai ba orang bukai.
Ngena pelasar QOTW Sarawak nya, iya ti kemerah agi dikelala ngena nama Noreen chakah negi hak enggau sada bala indai tunggal ti nerima nasip sebaka enggau iya.
Iya madah, bala indai tunggal patut pintar ngena peluang dikena ngemansangka diri empu ba mayuh sukut.
“Kitai patut bechunto ke pedagang nyulut baka Cecelia Lagak enggau Kimi Tomas lalu belajar ari sida chara dikena ngemansangka diri.
“Anang nyadi indu ti lemi semina bepanggai ba orang bukai baka diri sebilik, bala bakih enggau kaban belayan.
“Tang angkat meh ngemansangka pengidup diri empu lalu kena meh pengelandik dikembuan dikena nyungkak penatai diri,” ku iya.
BECHUNTO PENGIDUP DIRI
Noreen ti gawa nyadi siku Pemantu Pengawa Nyabut Ngeli ba Klinik Ngeli Kanowit chakah ngaul pengawa pemajik gamal.
Nya dikena iya nyungkak penatai pemisi tambah ngagai ruang bilik diri dikena melanja anak iya empu ngambi enda bepanggai ba orang bukai.
Pengudah abis jam gawa ba klinik, iya deka bejalaika dagang diri ti nyendia servis pemajik gamal baka servis nganta, ngemanjaika bulu mata enggau nyulam bulu kening.
Dikena nambah pengelandik diri ba pengawa nya, Noreen bela ngambi kus bekaul pemajik gamal nengah Setipikit Pengelandik Malaysia (SKM) baka Kus Pemajik Gamal enggau Estetik.
Ukai naka nya aja, iya bela ngambi kus pemajik gamal ti diatur Beauty Training Centre ba Bintulu ti dipungkal Cecelia Lagak begulai enggau Universiti Putra Malaysia (UPM), Serdang.
BUKA LAMBAR BARU
Kumang bajik nya ngelalau raban indai tunggal ngambi enda lemi ati enggau nyalah kediri empu ketegal pekara ti nyadi.
Ku iya, semua pekara ti nyadi sekali ke manah tauka jai nya endang ngembuan pemanah kediri empu.
“Anang sesekali nyimpan dendam enggau nyalahka orang bukai tang belajar meh ari pekara ti nyadi dikena ngangkatka diri nyadi manah agi.
“Taja pen bisi orang enda masa kitai tang ingat meh kitai bisi anak ditupi, batang pengawa, diri sebilik enggau orang ngelingi kitai ti sayau, nyukung sereta besampika pemujur kitai.
“Kembuan meh pengandal ati ngagai diri empu, ukai ketegal siku orang enda masa kitai ukai mai reti bejuta iku orang bukai ngembuan ulah sebaka,” terang iya.
Badu meh ngenang pengidup diri ti sinu, ku iya, tang kembuan meh runding ti positif lalu angkat meh nyadi indu ti kering napi sebarang penguji dikena ngemesaika anak diri.
“Ketegal kitai begelar indai tunggal meh kitai patut nyingkang ngagai pengidup baru. Begelar indai tunggal ukai bereti nya pengujung pengidup kitai.
“Semua utai ti nyadi endang udah ditaga Petara lalu bisi pekara manah ari pekara nya,” tandu iya.
RANSING BEDAGANG
Ngelansa pejalai diri ngaul pengawa pemajik gamal, Noreen madahka diri udah ngaul pengawa nya ari taun 2017 suba.
Keterubah suba, iya semina nyadi siku dropship ti nyual minyak angi enggau barang penganta aja ari bakih sama gawa.
Bepun ari nya meh iya ngembuan pengandal ati ti besai ulih ngembuan dagang kediri empu bekaul pengawa pemajik gamal.
Taja pia, ku Noreen, iya suah napi penanggul suntuk awak dikena bejalaika dagang nya ketegal ngembuan pangku pengawa diri.
“Laban ti gawa nyadi Pemantu Pengawa Nyabut Ngeli, aku gawa nitih syif (siang malam) tang aku enda nyerah alah.
“Ari nya meh aku belajar ngatur awak diri dikena bejalaika pengawa dagang tu ngambi ulih nyapai juluk diri.
“Anak meh nyadi pun peransang enggau tungkat pengering aku,” terang iya.
Ku Noreen, ingat meh enti kitai ngasaika diri tusah, mayuh agi orang bukai tusah agi ari kitai ba luar din.
