PROJEK pemansut kuasa karan 1,375 megawatt ti dikemansang Sarawak Energy Berhad (SEB) begulai enggau sebuah kompeni Indonesia di Kalimantan Utara (Kaltara) disadang ulih mantu ngamat ke projek Borneo Grid.
Projek nya kala disebut Premier Sarawak, Datuk Patinggi Tan Sri Abang Johari Tun Openg ba taun 2022 ngambi Sarawak ulih nyadi bateri Asean.
Projek hidroelektrik Kaltara ditaga nyendiaka bekal kuasa karan ngagai palan industri ke benung dikemansang di Kaltara.
Tapa pen projek nya di Indonesia, iya dikeandal ulih ngemuntang enggau ngemujur ke projek Borneo Grid.
Kitai bela nemu Perintah Sarawak ngemeratka pemansang kuasa ulih dikemaru ti meri pengulih ngagai Sarawak mantu Kaltara ngemansang kuasa hidro ngambi Kaltara mega ulih nyadi pengeluar kuasa besai.
Sarawak deka nyapai pemansang enggau pemujur ti meruan nengah sektor kuasa ulih dikemaru lalu nyadi wilayah besai ti nyendiaka bekal kuasa ulih dikemaru ti tau dikeandal sereta enda kelalu mar ngagai Asia Tenggara.
Perintah Sarawak deka mantu Kaltara ba pekara pemansang ba wilayah Indonesia nya laban enti Kalimantan mansang, Sarawak ulih mansang enggau lengkas agi.
Ba renggat keterubah, projek nya mantu Sarawak nyendiaka alur arus kuasa entara Sarawak enggau Indonesia.
Kedua, enti Kalimantan enggau indu mengeri baru Indonesia ba wilayah nya majak mansang, pemansang nya disadang meri pangka manah mega ngagai Sarawak.
Nya kebuah Perintah Besai Menua Malaysia mega setuju ngemansang Tebedu, Entikong enggau Ba’ Kelalan kelimpah ari mantu sekeda endur di Kalimantan sereta Long Midang.
INDU MENGERI BARU
Perambu Presiden Indonesia, Joko Widodo tauka Jokowi mindah indu mengeri besai ari Jakarta di Pulau Jawa ngagai Nusantara di Kalimantan Timur (Kaltim) ba Pulau Borneo ke beungkus AS$33 bilion (RM145 bilion) dikenuku baruh Undang-Undang Indu Mengeri ti dikemendar 95 peratus kaban Parlimen ba bulan Januari 2022.
Perintah Jokowi ngasai ke Nusantara nya sempama baka “mengeri jeman ila” (city of tomorrow) ti ngena konsep mengeri baru ti gadung sereta pintar.
Pegawai perintah ngaga kar sebuah metropolis ke tiga kali lebih besai ari New York City sereta empat kali lebih besai ari Jakarta ti mekuh ke kampung galau, kuasa ulih dikemaru ti beresi, pengangkut rama kuasa karan enggau penabar karbon manggai ba taun 2045.
Urung 65 peratus ari indu mengeri baru nya deka diubah pulai baru ari kampung pengeluar asil baka ke diatu ngagai kampung tropika.
Sebengkah pansik biodiversiti benung digaga, sebaka enggau perambu ke deka nyendia sebuah pulau santuari endur nyimpan lalu nyaga 80 orang utan tuai, sekeda iya ari zoo Europe.
Ditangguh ketegal pandemik Covid-19, pengawa ngaga infrastruktur semina belabuh ba tengan taun 2022, 20 bulan sebedau pengawa bepilih besai parlimen enggau presiden ba taun 2023- 2024, 29 bulan sebedau presiden baru angkat sumpah kena 20 Oktober 2024.
Pengereja pengawa udah nembu ke urung 15 peratus ari infrastruktur mengeri baru.
Nya tebal agi ba kandang pugu 1,000 hektar ari pemesai 6,700 hektar ke disebut Chairman Kaunsil Indu Mengeri Nusantara, Bambang Susantono udah bisi “pengasai enggau semangat sebuah mengeri ti tau nyadi endur diau”.
Pengawa ngaga infrastruktur renggat keterubah nyengkaum ngaga astana presiden baru ti dipelaba dibuka kena 17 Ogos 2024, maya Indonesia ngintu Hari Merdeka Ke-79, Seraya opis Sekretariat Perintah enggau opis menteri pekara dalam menua, opis menteri pengelikun menua sereta opis menteri pekara luar menua.
Pemindah penuh 35 opis menteri perintah besai disadang tembu pemadu jampat ba taun 2035.
Pengawa nya deka ditangkan pemansang ekosistem ngaul Nusantara enggau dua mengeri, Balikpapan sereta Samarinda, ke udah disambung jalai besai penyauh 100 kilometer.
Bisi 17,000 iku pengereja pengawa ditaga mindah ngagai Nusantara ba taun 2024 nyengkaum 12,000 iku staf perintah enggau 5,000 raban soldadu sereta polis.
Lalu 60,000 birokrat bukai deka dipindah berenggat pengudah taun 2025.
Indu mengeri baru nya naka diatu udah nerima 167 surat niat, setengah ari kompeni Indonesia lalu setengah ari kompeni ba 16 menua bukai.
KEBUAH INDU MENGERI DIPINDAH
Media suah nyebut pemindah indu mengeri bisi kaul enggau Jakarta ti benung tenggelam belubahlubah ke dalam tasik kelimpah jalai alun ti sekut ketegal pengangkut sereta mensia ke kelalu mayuh.
Tang iya nyengala lebih ari nya laban nitih ke penemu Jokowi, pemindah indu mengeri nya ulih nyemela pemansang ekonomi rama ba wilayah tauka pulau bukai enggau pemansang ekonomi ti dominan ba Pulau Jawa.
Urung 56 peratus ari 274 juta peranak Indonesia diau ba Pulau Jawa, ti ngasilka 60 peratus ari Asil Kasar Dalam Menua (GDP) menua Indonesia.
Jakarta ngasilka satu per lima ari penyampau nya, tang lima wilayah di Kalimantan ti kaya enggau pengeraja asal semina ngasilka 10 peratus aja.
Nusantara sebagi ari Vision Indonesia 2045 ke diperambu Jokowi enggau bejuluk ke pemansang teknologi sereta modal mensia, pemansang ekonomi ti meruan, pemela rama sereta penegap menua.
Pemindah indu mengeri nya engka bisi mega besangkut paut enggau politik.
Jokowi keterubah nibar penemu nya ba taun 2015, setaun pengudah iya nyadi presiden.
Penemu tu majak diterima lebuh pengawa bepilih gabenor Jakarta ba taun 2017 lalu nyadi perambu ke meseti dikereja pengudah pengawa bepilih presiden ba taun 2019.
Kededua pengawa bepilih nya nunjuk ke pengering raban ekstremis Islam ba Jawa Barat, wilayah ti ngelingi Jakarta, kelebih agi pengawa mantah bebala mayuh ti ngelabuhka bakih Jokowi ke mega Gabenor Jakarta bebansa China Kristian, Basuki ‘Ahok’ Purnama.
Taja pia, palan dagang besai baru udah ditumbuh di Jakarta pengudah rayat ke kaya pindah ngagai indu mengeri nya lalu marit dagang baru sereta ngemanahka agi pengawa berumah.
Reti iya, Jakarta deka majak nyadi palan finansial enggau dagang Indonesia ti besai.
PRESIDEN BARU
Taja pia, indu mengeri baru enda ulih digaga lalu tembu ba timpuh sehari aja. Canberra di Australia ditengkebang ba taun 1913, tang parlimen semina nyadi 14 taun udah nya ba “sekeda menua pesisir ti ngiga sebuah mengeri”, ku John McBeth dalam artikel iya Will Widodo’s city of tomorrow survive his rule? ba laman berita portal Asia Times.
Pekara nya tejanggal ketegal penusah ekonomi dikangau The Great Depression enggau Perang Dunya Kedua, lalu Canberra nyadi penuduk perintah ti tulin 40 taun udah nya.
Ba kes Nusantara, pengelengkas pemansang dipelaba deka dikenuku ari penyampau agih belanja ari sektor peribit.
Enda baka Canberra enggau indu mengeri menua bukai, baka Naypyidaw (Myanmar), Brasilia (Brazil), Nur-Sultan (Kazakhstan) sereta Abuja (Nigeria), Nusantara endang indu mengeri baru keterubah dipindah ari sebuah pulau ngagai pulau bukai.
Iya mega indu mengeri keterubah ti diperambu deka bepanggai ba modal ari menua luar enggau sektor peribit lalu ukai ba bajet perintah.
Taja pia, bajet perintah diguna dulu naka diatu dikena nunjuk ke pemindah nya amat nyadi ngambi bisi pengandal ngagai perintah besai Indonesia ba renggat antarabansa enggau sektor peribit, tang tu nyadi kontroversi laban penunga projek nya pengudah Jokowi badu nyadi presiden ila bedau nyengala.
Ketegal nadai agih belanja alternatif, bajet perintah mega dikena dulu ngambi projek nya ulih berengkah dipejalai.
Penemu mensia mayuh senentang pemindah indu mengeri nya enda sebaka enggau siti pansik ti nunjuk 48.5 peratus responden nyukung pemindah nya lalu 44 peratus enda nyukung kelebih agi perayat Jakarta empu.
Taja pia, pemansang enggau pemujur indu mengeri baru nya ila bepanggai ba orang ke nyilih Jokowi udah tu ke deka dikenuku nengah pengawa bepilih besai di Indonesia ba taun 2024.
Kati presiden baru ila bisi semangat Jokowi lalu deka nerus ke pengawa ngemansang Nusantara, indu mengeri futuristik ti dikelingi kampung di Kalimantan?
Susantono, Chairman Kaunsil Indu Mengeri Nusantara, madah Undang-undang Indu Mengeri meri pelasar undangundang ngagai pemindah indu mengeri nya ti enda tau enda dititih presiden baru ngambi juluk Jokowi nya meruan idup sereta dikemansang.
Chalun ke deka menang ba pengawa bepilih presiden kena 14 Februari 2024 meseti bisi sukung ari Jokowi.
Siku chalun ti tebilang nama, Gabenor Jawa Tengah, Ganjar Pranowo nyukung perambu indu mengeri baru Jokowi lalu naka diatu bulih sukung pemadu tinggi.
Sarawak endang nerima manah pemindah indu mengeri Indonesia ari Jakarta ngagai Nusantara laban nya disadang deka meri empas manah ukai semina ngagai Sarawak aja, tang mega ngagai selampur Borneo, pulau ketiga pemadu besai di dunya enggau pemadu besai di Asia.
Sarawak, Kalimantan, Brunei enggau Sabah ulih nyapai pemansang enggau pemujur ekonomi, pemeruan rampa menua, penyerakup, pengelantang sereta pengelikun enti perintah empat wilayah nya ulih ngaga lalu ngereja perambu pengawa ke meri pemanah ngagai semua.
