Nyaga Diri, Nyaga Semua

KUCHING: Kepala Menteri Datuk Patinggi Abang Johari Tun Openg nyadi orang keterubah dituchuk vaksin Pfizer Covid-19 pukul 3.05 lemai kemari.

Kelimpah Abang Johari, Sapit Kepala Menteri Datuk Amar Awang Tengah Ali Hasan mega sama nerima vaksin nya.

Udah nya ditangkan, Menteri Kaunsil Kandang Menua enggau Pengawa Berumah Datuk Sri Prof Sim Kui Hian enggau Direktor Pengerai Nengeri Dr Chin Zin Hing.

Sida betuchuk vaksin ba Klinik Petrajaya ditu seraya dipandang terus ari Facebook Ukas.

Pengudah dituchuk vaksin semua sida ke bela mandangka poster ‘Lindung Diri, Lindung Semua’ ke ngundan reti Nyaga Diri, Nyaga Semua.

Vaksin Pfizer BioNTech digaga asil ari kerejasama Amerika Syarikat enggau Jerman lalu dipechaya ngasi 92.6 peratus.

Vaksin tu kala dipansik, pemansik ari menua Israel ti madahka vaksin nya ngasi 85 peratus ba tuchuk ti keterubah.

Kelimpah ari nya, dua iku pemansik ari Kanada, Danuta Skowronski enggau Gaston De Serres madahka vaksin Pfizer Covid-19 ngasi 92.6 peratus ba tuchuk ti keterubah.

Vaksin ke datai ensana nya deka disadung berenggat ngagai raban ti diselinting nyengkaum raban gawa di luan.

Kepala Menteri Datuk Patinggi Abang Johari Tun Openg benung nerima tuchuk vaksin Pfizer Covid-19 ba Klinik Petrajaya, kemari.

Suara Sarawak