LUBOK ANTU: Ex-Kaban Parlimen Lubok Antu, Datuk William Nyallau Badak ningkilka diri ari Parti Sarawak Bersatu (PSB) lalu meri sukung ngagai Gempung Parti Sarawak (GPS).
Ku iya, surat ningkilka diri ari parti nya udah disua ngagai Sekretari Besai PSB lalu siti salin dianjung ngagai Presiden Datuk Seri Wong Soon Koh.
“Pemutus Pengawa Bepilih Besai Nengeri Ke-12 (PRN-12) nyata nunjukka penyerakup rayat Sarawak chukup beguna.
“Sarawak semina tegap enti rayat beserakup. Sarawak enda patut pambar lalu kitai mesti begempung.
“Ari embing Premier Sarawak, Datuk Patinggi Tan Sri Dr Abang Johari Tun Openg sereta Sapit Premier Datuk Amar Douglas Uggah Embas, GPS ngemansangka Sarawak enggau meruan ungkup rayat Sarawak empu.
“Nya kebuah aku deka mai baru penyerakup tu nyadika pengering enggau penegap menua. Ari nya tadi, aku ngaga pemutus ningkilka diri ari PSB lalu nyukung GPS,” ku iya ba sebengkah penerang tadi.
Nyallau mega nyemetak madah, penyerakup rayat ulih nempa Sarawak tegap agi.
