Nyelai dikumbai pasun, jelu mansau pisang

PAKAN: Peranak Rumah Nyalong Anak Tambi, Segera ditu tegepang pengudah tepedaka siku jelu ke nyelai.

Nitih ke penerang ari Sibat Pengiran, 30, gamal jelu ke ke mujur ditangkap sida serumah nya nyau deka sebaka enggau tupai tauka chit kampung.

“Enda kala meda jelu nya, pala chura burak, bekelapung iku enggau bulu tengan tubuh ia bisi mansau mimit,” ku iya.

Ia madah ke penerang nya lebuh ke dirandau pengarang berita, apin lama ke udah.

Ku Sibat madah, jelu nya ditangkap sida serumah ba tisi pagar sekula ke besemak enggau rumah panjai.

“Sepengudah ke ditangkap jelu nya lalu dibai laban deka nanya penemu orang ke tuai.

“Bisi mega sida ke tuai madah jelu nya tadi dikumbai sida jelu mansau pisang kelimpah kedua ngumbai nya jelu pasun,” ku iya.

Nangkan nya, iya madah jelu pasun tu dikumbai kitai bansa Iban ukui antu ke tau nyalak mensia.

“Ninga ke ajar orang ke tuai, jelu nya udah dilepaska baru,” ku iya.

Nambah ke nya, Sibat madah jelu nya tadi bisi nikal pulai baru ngagai palan jelu nya ke ditemu tang diburu sida baru.

Udah nya, jelu ke nyelai sereta enda kala dipeda nya lalu nadai agi ditemu sida udah di diburu lalu tama ke dalam babas.

Nitih pengarap lama kitai Iban, jelu pasun tu enda tau dibunuh ngapa laban tau mali nyadi antu gerasi.

Enti nyema enda sengaja tebunuh ke iya, meseti ditinggang enggau rangkang kayu. Kebuah pia, ngambika antu gerasi ngumbai ukui tu mati kena tinggang kayu lalu ukai laban jari anak mensia.

Suara Sarawak