ARTIKEL

Nyeleti sekula repuk besai belanja

Facebook
Twitter
LinkedIn
WhatsApp
Telegram

KUCHING: Sarawak begunaka agih belanja ti chukup dikena nyeleti, ngentak baru tauka mindah semua sekula repuk di nengeri tu ba Bajet MADANI 2024.

Ku Menteri Pelajar, Inovasyen enggau Pemansang Penau, Datuk Roland Sagah Wee Inn, pekara nya beguna amat ngambi pengawa nyeleti 1,020 sekula repuk ti udah dikenuku di nengeri tu ulih ditampung enggau lengkas.

“Pekara besai ti dikedeka kitai iya nya nyeleti semua 1,020 buah sekula repuk ti udah dikenuku laban ba baruh agih belanja panjar RM1 bilion, iya semina chukup dikena nyeleti tauka ngentak baru pukul rata urung 140 buah sekula ninting taun.

“Nyadi kita ulih melaba berapa mayuh agih belanja ti diguna ungkup semua sekula nya.

“Kelimpah ari nya, kitai deka pengawa nyeleti nya dikereja enggau lengkas laban enti majak lama, pendiau sekula deka majak repuk sereta enda likun,” ku iya pasal agih belanja Belanjawan MADANI 2024 ungkup Opis Menteri Pelajar Malaysia (KPM).

Sagah nyebut nya lebuh dirandau pemberita pengudah bejadi Program Negap Pedagogi Pemansang Profesional Meruan ungkup Pengajar Sains, Matematik enggau Jaku English Sekula Primari di Sarawak Taun 2023 ditu, kemari.

Ku iya agi, taja pen KPM netap pengawa nyeleti sekula repuk nitih kategori tikas begunan repuk, tang iya mega meseti berundingka pekara bukai nyengkaum pendiau kuarters pengajar.

“Kelimpah ari nya, pengawa nyeleti nya begunaka timpuh ti lama.

“Nya alai kitai irau enti sema sekula ke diatu ba Tikas 5, engka iya nyadi Tikas 6 enggau Tikas 7 laban udah kelalu lama diteju repuk.

“Kelimpah ari nya, kitai ukai semina irau pasal blok akademik tang mega begunaka kuarters pengajar ti manah laban iya beguna amat dikena meri semangat ngagai bala pengajar ngajar,” ku iya nyemetak.

Ngelansa pasal jaku Menteri Besai, Datuk Seri Anwar Ibrahim ti madah KPM deka terus nerima agih belanja besai ba Belanjawan MADANI 2024, iya madahka diri apin nerima penerang silik pasal pekara nya.

“Kitai begunaka penerang silik pasal agih belanja nya nyengkaum bansa bantu ti diberi.

“Tang kitai ngarap agih belanja lebih diberi dikena nyeleti semua sekula repuk ungkup pemanah enggau pemujur bala anak Sarawak jemah ila,” ku iya seraya madahka naka diatu, 140 buah sekula bukai agi ba bemacham renggat pengawa lalu dipelaba tembu ba timpuh tiga taun.

KPM nerima agih belanja RM55.2 bilion nengah Bajet 2023 enti dibanding enggau RM52.6 bilion nengah Bajet 2022.

Penyampau RM2.3 bilion ari agih belanja nya disedia kena nentuka infrastruktur sereta fasiliti belajar pemadu manah ba semua sekula, nyengkaum RM920 juta dikena nyeleti begunan enggau infrastruktur ba 380 sekula repuk kelebih agi di Sabah enggau Sarawak nengah chara ‘perolehan khas’ ngambi lengkas diberi.

Naka June taun tu, 33 ari 351 buah sekula di nengeri tu dikemendar bejalaika projek nyeleti enggau ngaga baru begunan dalam Rolling Plan 1 Langgur Pemansang Malaysia Lumpar Ke-12 taun 2021 nyentuk Rolling Plan 3 taun 2023 KPM.

Ari taun 2016 nyentuk diatu, 380 projek nyeleti sekula repuk di Sarawak udah dikemendar lalu ari penyampau nya, 223 projek udah tembu.

LAIN-LAIN BERITA

Bakih strategik KGC deka ditambah

SARIKEI: Opis Menteri Pemansang Indu, Nembiak Mit enggau Pengelantang Komuniti Sarawak (KPWK) benung chakah ngatur pengawa sida ngambi mayuh agi premis nerima Kenyalang Gold Card

TYT Sarawak bulih gelar Pehin Sri

KUCHING: Tuai Pemegai Menua (TYT) Nengeri Sarawak, Tun Dr. Wan Junaidi Tuanku Jaafar udah nerima Darjah Utama Yang Amat Mulia Satria Bintang Sarawak (S.B.S) ke

KDJA ngerami 200 pengemeran media malam tadi

KUCHING: Lebih 200 iku pengemeran media dirami nyerumba Pengerami Makai Lemai Taun Baru China Gerempung Pemberita Bagi Menua Kuching (KDJA) malam tadi. Sekeda program bisi

Sistem belanja seikas menua maju

MIRI: Perintah Sarawak benung nungkap pengawa numbuhka sistem belanja ti seikas enggau menua ti udah maju ba rantau tu. Premier Sarawak Datuk Patinggi Tan Sri

BERITA TERBARU

Sarawak berada di depan transformasi digital

SEPANYOL: Sarawak berada di barisan hadapan dalam transformasi digital sekali gus memanfaatkan teknologi untuk memacu inovasi dan produktiviti merentasi pelbagai industri. Menurut Menteri Utiliti dan