PROJEK ngaga Indu Opis Gerempung Serakup Orang Ulu Sarawak Malaysia (Forum) ukai semina nyadi ‘rumah’ raban bansa Orang Ulu tang deka nyadi siti ari tanda menua di Mengeri Besai Miri udah iya tembu ila.
Indu Opis ti beungkus RM25 juta didiri atas tanah perintah nengeri pemesai lima ekar ba Jalai Padang Kerbau disadang tembu dalam timpuh 18 bulan.
Nambahka nya, gaya langkar begunan nya diambi belalauka penempa enggau kaul budaya enggau seni raban bansa Orang Ulu empu.
Iya mega deka disikap chukup perengka guna baka balai mayuh guna, bilik seminar, laman besai, opis, laman landskap enggau galeri budaya Orang Ulu.
Indu Opis tu nyereminka penegap kaul serakup raban bansa Orang Ulu nengah semilan serakup ti begempung di baruh Forum.
Gempung serakup nya nyengkaum Serakup Kayan Sarawak, Serakup Bansa Kenyah Sarawak, Rurum Kelabit Sarawak, Serakup Bisaya Sarawak, Serakup Saban Sarawak, Serakup Berawen Sarawak, serakup Lun Bawang Sarawak, Petipun Penan Sarawak enggau Lakiput Sarawak.
Iya mega cheremin ngagai polisi mungkur semua tauka inklusif baka dibantaika Kepala Menteri Datuk Patinggi Abang Johari Tun Openg ngagai semua raban bansa di Sarawak.
Sapit Speaker DUN ti mega Penyanding Penemu Forum, Dato Gerawat Gala madahka tuju nirika nya ngambi bisi endur ngatur pengawa ngaul main asal, pengawa mandang enggau ngelakuka produk pengelandik jari sereta produk ari menua ulu.
“Kitai naka ulih ngelakuka palan Forum tu nyadi siti ari pematak besai baru sektor dagang temuai di Miri, kira diangkat nyadi Kampung Budaya Orang Ulu.
“Perintah meretika peminta lalu ngamatka juluk ati Orang Ulu, dia sebuah palan tauka “rumah” penyelai adat rnggau main asal Orang Ulu lalu nyadi kelai penegap kaul serakup bansa asal ke udah bisi,” ku iya.
