KUCHING: Perintah udah ngemendarka agih belanja RM10.14 juta ba baruh ‘Pelin Pengatur Ungkup Program Nyaga Enggau Munas Rabies 2020’.
Sapit Kepala Menteri ti mega Chairman Komiti Penyangga Penusah Ngenyit Nengeri (JPBN) Datuk Amar Douglas Uggah Embas madahka, perintah seruran meri sukung ngagai pengawa nagang kes rabies nyengkaum nyendiaka agih belanja munaska virus nya.
“Vaksin rabies diberi pechuma nengah agih belanja tu nyengkaum meri vaksin nuju rumah ke rumah orang ti bisi ukui.
“Kelimpah ari nya, atur neritka atur ‘Veterinar Health Ordinance 1999’ ungkup ngaga lisin enggau atur nagang ukui mindah bisi ngurangka penyampau kes positif rabies di menua tu,” ku iya.
Teks Uggah dibacha Sekretari Mendam Opis Menteri Kaunsil Kandang Menua enggau Pengawa Berumah Datu Antonio Kahti Galis lebuh bejadika Hari Rabies Sedunya di Balai Raya Kaunsil Mengeri Kuching Selatan (MBKS) ditu, pagi tadi.
Tandu iya, Sarawak nagit kusung kes rabies ngaul mensia ba taun 2021 enggau kusung kes rabies ngaul ukui ba taun 2025.
“Diatu dunya benung ngiga chara pemadu manah dikena mutarka penanggul ukui dirampit rabies.
“Entara pekara ti digaga baka sistem ‘sosiobudaya’ dalam ngubah runding orang pasal rabies enggau tanggungpengawa nyaga ukui enggau betul.
“Kelimpah ari nya, kompetensyen teknikal ti manah dalam pekara pengerai jelu enggau pengerai mensia mayuh mega patut diberi perati munaska rabies,” ku iya.
Kenu ku Uggah, chara nguruska kes kena tagum mesti digaga enggau manah ngambika enda ngerua vaksin rabies ungkup mensia enggau imunoglobulin rabies.
“Organisasyen ditumbuhka nengah kerejasama entara Opis Pengerai, Opis Servis Jelu, Opis Kaunsil Kandang Menua, Ukas enggau ejensi bukai mega bisi digaga dalam nagang kes rabies.
“Mayuh pengawa dalam merambu aktiviti enggau kereja mutarka penanggul rabies digaga baka mutarka abi kena tagup, kes ukui ti enda bepengerai enggau ke bukai,” ku iya.
Sama bisi datai Datuk Bandar Kuching Selatan Datuk Wee Hong Seng, Datuk Bandar Kuching Utara Datuk Junaidi Reduan, Chairman Kaunsil Kandang Menua Kota Samarahan Datuk Peter Minos, Direktor Opis Servis Veterinar Sarawak Dr. Adrian Susin Ambud enggau ke bukai.
