Trending

Op Selamat 18 deka dipejalaika 10 hari nyerumba Aidilfitri

Facebook
Twitter
WhatsApp
Telegram
E-mel
JAGA PENGELIKUN…Datuk Mohd Azman (dua kanan) dikemata bala bukai ngerasukka topi kelidar ngagai siku deriba motosikal pengudah bejadika Op Selamat 18 nyerumba pengerami Raya Aidilfitri 2022 ba mua jalai Kedai Besai Boulevard, Kuching. Gambar : Mohd Alif Noni

KUCHING: Polis Sarawak deka ngepunka operasyen khas, ‘Op Selamat 18’ pengelama 10 hari bepun sehari tu nyerumba Hari Raya Aidilfitri 2022.

Kepala Polis Sarawak Datuk Mohd Azman Ahmad Sapri madah, operasyen nya mungkur 750 pegawai enggau raban Polis Kontinjen Sarawak ari bemacham unit ke deka bejalaika pengawa berambaika jaku ‘Rumah Likun, Selamat Datai Ba Endur Dituju’.

“Raban staf tu mungkur Opis Pansik Penerit Adat Trafik penyampau 440 iku enggau Opis Nagang Penyalah enggau Pengelikun Komuniti penyampau 115 iku.

“Pia mega, Opis Pansik Penyalah bisi 62 iku, Opis Pansik Penyalah narkotik bisi 45 iku, balai tauka pangku pengawa khas bisi 63 iku sereta unit bukai bisi 25 iku pegawai.

“Bisi 56 palan dipilih endur bejalaika Ops Selamat mungkur 36 endur ba Jalai Perintah Besai enggau 20 sitak ba jalai nengeri,” ku iya.

Mohd Azman mansutka jaku nya ba aum pemberita pengudah ngelancharka Op Selamat 18 pengerami Hari Raya Aidilfitri Tahun 2022 di begunan Boulevard, kemari.

Ku iya, pengawa neritka atur deka dipejalai enggau dua pekara iya nya nagang penyalah nyerungkai rumah enggau ngurangka kes aksiden.

Nambahka nya ku iya, Op Selamat mega dikena nagang penyalah nyerungkai rumah ke ditinggalka maya pulai kemisi.

“Kami deka bejalaika pengawa nginau nentuka kedai enggau rumah ditinggal nya likun,” ku iya nerang.

Nambahka nya ku iya, sida ke ninggalka rumah pulai ke menua dipinta ngisi pom pulai menua ba balai polis besemak tauka ngisi pom nengah aplikasyen telefon pintar (VSP).

Ku iya, naka diatu nadai sebarang kes nyerungkai rumah ba genturung pendiau ti udah diripotka nengah aplikasyen VSP di Sarawak.

Kelimpah ari nya, iya meransang mensia mayuh terus ngena servis aplikasyen nya nentuka polis muntang agi bejalaika pengawa nginau ba sebengkah endur.

Iya mega meransang mensia mayuh bejejaga enggau nitihka atur perintah dikena nagang Covid-19 ari ngerekai maya pengerami tu ila enggau nitihka Atur Pengawa Standard (SOP) pemadu baru ari Opis Menteri Pengerai Malaysia (KKM) ungkup pengelantang begulai.

Sama datai ba pengawa tu iya nya Sapit Kepala Polis Sarawak Datuk Mancha Ata, Direktor Opis Bomba enggau Penyah Penusah Malaysia Sarawak (JBPMS), Datuk Khirudin Drahman @ Hussaini sereta Tuai Opis Pansik enggau Penerit Adat Trafik Sarawak, Superintendan Bingkok John.

Suka artikel:

e-Akhbar Suara Sarawak

Berita Berkaitan

E-Paper

26 November 2023

Berita Terbaru