OPA mujur, rayat likun

KUCHING: Operasyen Ngaga Mua Hari (OPA) berengkah kemari nyentuk 22 September tu ngena bilun C130 Soldadu Langit (TUDM).

Taja pia ku Sapit Kepala Menteri ti mega Chairman Komiti Pemutar Penusah Ngenyit Nengeri (JPBN) Sarawak Datuk Amar Douglas Uggah Embas madah, operasyen tu mega dipejalai bepanggai ba pemanah remang.

“Seharitu (kemari) kitai berengkah ngaga OPA berengkah ari Kuching, Kota Samarahan, Serian, Sri Aman, Betong, Saratok, Sarikei, Kanowit, Sibu, Mukah lalu pulai ngagai Sematan, Bau.

“Taja pia, operasyen tu bepanggai ba gaya mua hari laban pengawa OPA tu begunaka remang. Makin besai remang makin manah,” ku iya.

Uggah bejaku munyi nya lebuh meri penerang ngagai pemberita sereta ngelawa palan penerebai bilun C130 ba Pengkalan TUDM ditu pagi tadi.

NGAGA MUA HARI… Uggah (tiga kiba) ninga penerang ari pemesai APM enggau Opis Pengemata Gaya Hari Malaysia (Sarawak). Gambar NADIM BOKHARI.