Operasyen ba sekula semina ungkup nembiak ke ngambi peresa

KUCHING: Operasyen ba sekula di Sarawak semina ungkup raban nembiak ke deka ngambi peresa Sijil Pelajaran Malaysia (SPM), Sijil Vokasional Malaysia (SVM), Sijil Kemahiran Malaysia (SKM), Sijil Tinggi Persekolahan Malaysia (STPM), Sijil Tinggi Agama Malaysia (STAM) enggau Diploma Vokasional Malaysia (DVM) taun 2020 enggau 2021 tauka peresa entarabansa ti seikas.
Chairman Komiti Penyangga Penusah Ngenyit Nengeri (JPBN) Datuk Amar Douglas Uggah Embas madahka operasyen institusyen nembiak Baruh Opis Menteri Pelajar (KPM) ba palan Atur Tagang Pejalai (PKP) enggau Atur Tagang Mindah Belebas (PKPB) di Sarawak semina ngaul sida ti deka napi peresa tinggi aja.
“Nembiak ba sekula ‘asrama penuh’ enggau sekula pulai hari ti deka napi peresa nya dikemandar pulai ke buding sehari tu (kemari) seriris enggau gerah ti dipansutka KPM sebedau tu.
“Kelimpah ari nya, semua nembiak sekula primari (Prasekula, Primari 1 nyentuk Primari 6) enggau nembiak Pom 1 nyentuk Pom 4 di sekula Sekondari deka nitihka Atur Belajar enggau Ngajar Ari Rumah (PdPR),” ku iya.
Uggah bejaku munyi nya ngagai pemberita bekaul Covid-19 ninting hari di Dun Lama ditu, kemari.
Ku iya, PdPR ti dipejalai tu tau nitihka penyamai raban pengajar enggau nembiak bepun 20 Januari tu ila.
“Atur tu mega diguna ungkup nembiak Semester 2 SVM enggau Semester 2 DVM taun 2020 di Kolej Vokasional selampur Sarawak,” ku iya.

Suara Sarawak