Operasyen ngerara angus kerapa di Tisak udah diketu

SRI AMAN: Pengawa raban Bomba Betong ti ngarara tanah kerapa ke angus pemesai urung 27 hektar ba Ulu Sungai Tisak ditu masuk hari ke-11 ke udah mujur diketu lemai kemari.

Beduduk ari nya, Pemesai Bomba Kanan (PBK) 1, ari Balai Bomba Betong Henry Jugah meri terima kasih ngagai pengari rayat Adun Bukit Saban, Datuk Amar Douglas Uggah Embas, Adun Layar Gerald Rentap Jabu enggau Adun Engkilili Dr Johnical Rayong Ngipa laban seruran meri sukung ngagai sida sekumbang operasyen ngerara api ba sitak ke angus.

“Sekali agi aku meri terima kasih ngagai Adun Engkilili laban ke udah betatika pengawa kami. Iya udah meri peransang ngagai kami sekumbang kami bejalaika pengawa ngerara api ditu,” ku iya.

Henry madah munyi nya rambau nerima penatai raban Volunteer Opis Pengintu Pengelantang Pendiau (JKM) Sri Aman betuaika Nancy Rangkong ngarika Adun Engkilili nganjung bantu ai irup enggau pemakai ngagai raban bomba ti ngerara api ba endur nya.

Penatai raban volunteer tu ngabas palan ke angus seraya nyuaka barang pemakai enggau ai irup.

Sama bisi PPgb Vincent Baling Yabi enggau Tuai Rumah Tracy, Nanga Tisak.

DATAI NGABAS…Nancy (enam kiba), Tr Tracy (lapan kiba) enggau Henry (empat kiba), Vincent (lima kiba) sereta bala bukai maya datai ngabas tanah kerapa ke angus di Ulu Sungai Tisak.