KUCHING: Kepala Menteri Datuk Patinggi Abang Johari Tun Openg ngabas dua palan bebelika barang pemadu besai di Sarawak seraya matau operasyen Palan Meri Vaksin (PPV) dikena nagang pandemik Covid-19, ditu kemari.
Abang Johari berengkah ngabas The Spring pukul 9 pagi kemari sebedau ngagai Vivacity disempulang Sapit Kepala
Menteri Datuk Amar Douglas Uggah Embas sereta Menteri Kaunsil Kandang Menua enggau Pengawa Berumah, Datuk Seri Dr Sim Kui Hian.
Pengawa muka PPV ari raban pengatur pengawa ba dua palan besai bebelika barang nya inisiatif industri dikena nyukung pengawa perintah deka ngerumban Program Betuchuk Vaksin Covid-19 Nasional (PICK).
The Spring nagit meri vaksin ngagai urung 10,000 iku penerima baka staf serikat enggau perenchit ba timpuh enam minggu tu.
Nya kebuah, raban pengatur pengawa ngena ringkat dua palan besai bebelika barang nya lalu pengawa meri vaksin deka dipejalai raban perubat ari Sepital Pakar Kuching (KPJ).
Pengawa nya udah dipejalai kena Hari Empat tu tadi ke alai bisi 400 iku udah nerima vaksin Sinovac lalu pengawa nya deka ditambah ngagai 900 iku penerima ninting hari nyengkaum maya ujung minggu.
Nambahka nya, raban pengatur di The Spring madahka sida nadai nerima sida ke datai chara ‘walk in’ lalu sida ke bisi semaya ba MySejahtera aja diterima.
Nangkan nya ba Vivacity, sida nagit meri vaksin ngagai 2,000 iku staf perenchit enggau staf pengelama empat hari.
Pengawa meri vaksin nya PPV nya deka dipejalai Klinik Perubat Khaira betuaika Dr T S Khaira sereta disaup 20 iku staf perubat begulai enggau 60 iku volunteer ari raban pengatur Vivacity nya empu.
Pejalai ngabas PPV nya pengelama sejam nya udah nitihka semua Atur Pengawa Standard (SOP).
Pengawa meri vaksin ba PPV ba dua palan besai bebelika barang nya lanchar dipejalai baka nyendiaka papan tanda, endur rejister, endur nganti enggau ke bukai.
Pengawa nya dikena meri pengandal ngagai penguna lebuh sida bejalai kia berapa bulan agi laban semua staf udah nerima vaksin.
