Ops Jala bisi asil, 20 Pati mujur ditangkap

KOTA SAMARAHAN: Operasyen Jala (Ops Jala) ke dilanchar kenyau Disember taun nyin kemari diperati bisi asil iya nya 20 iku Kampar Nadai Pemendar (Pati) mujur ditangkap dalam timpuh dua hari ke udah.
Sapit Kepala Menteri, Datuk Amar Douglas Uggah Embas madah kes import ke bisi nyadi ba nengeri tu nyadi sebengkah ari pemar ditapi Komiti Penyangga Penusah Nengeri Sarawak (JPBNS).
Kenu ku Uggah, Pati ke gawa ba mayuh bengkah sektor di nengeri tu chukup ngirauka ati laban status pengerai sida enda temu.
“Nya alai, aku minta bala pengaji ke bisi ngupah Pati patut nentuka sida nya beperesa pengerai enggau diserah ngagai Opis Imigresen Malaysia (JIM).
“Nyema sida enda ngereja nya, kitai deka neritka atur dibaruh Operasyen Jala ke udah diterit,” ku iya.
Iya madah munyi nya maya ngabas Institut Pemansang Kampung Sarawak, ditu ensana.
Kelimpah ari nya, ku iya Opis Imigresen Malaysia (JIM) udah nangkap 450 Pati ba selampur nengeri tu kenyau pun taun nyin kemari nyentuk 20 Januari ke udah nengah Operasyen Sapu.
Nerang silik pasal penyampau palan kuarantin, ku Uggah ke mega chairman JPBNS, tikas penerebai tama ke nengeri tu udah dikurang bepelasarka penyampau palan kuarantin ke bisi.
“Kitai belajar ari penyadi besai ke nuntung nengeri tu lebuh diasuh kuarantin ba rumah ngujungka kes ngerekai ba Sarawak lebih agi di Sibu enggau Miri.
“Nya alai, pemutus terus digaga ngurangka penyampau penerebai bilun awakka hotel chukup ba pintu penama di Kuching, Sibu, Bintulu enggau Miri,” ku iya.
Tandu Uggah, JPBNS mega udah ngaga pemutus bejalaika atur mesti kuarantin pengelama 14 hari.
Ku iya, sekeda kes sebedau tu dikenuku positif Covid-19 pengudah beperesa ba hari kedua enggau kelapan.
“Nya alai, bisi sekeda kes ditemu positif ba hari kesepuluh enggau hari nangkan ke nya, nyadi Opis Pengerai Nengeri Sarawak udah ngeletak kuarantin penuh pengelama 14 hari.
“Aku mega dipadah bisi sekeda raban enda meretika atur tu tang aku minta mensia mayuh bela nguji nitihka atur tu.
“Tu endang amat tusah dititih. Bisi nya pechuma bisi nya bebayar tang laban penyadi tu aku meri terima kasih ngagai mensia mayuh laban nadai ngira tusah ketegal nentuka pengerai orang bukai,” ku Uggah.