Ops Mabuk : 35 saman dikeluarka polis

KUCHING: Tiga iku lelaki menua tu dipelabaka deriba maya mabuk mujur ditan pengudah puntan ngelarika diri ari Sekat Jalai Alun ke digaga raban penerit adat di Jalai Padungan, kemari.

Ketuai Polis Pelilih Kuching ACP Awang Din Awang Gani madahka, keketiga saspek nya entara penguna jalai alun ti ditan laban penyalah trafik asil ari operasyen urung jam 9.30 malam ngagai pukul 1 pagi.

Ku iya, operasyen nya dipejalai sepuluh iku raban Bagi Menua Pansik enggau Penerit Adat Trafik (BSPT) ari Indu Opis Polis Pelilih (IPD) Kuching sereta dibantu empat iku raban Unit Peronda (MPV) enggau Soldadu Darat Malaysia (ATM).

“Pengudah peresa SD2+ tetemuka keketiga saspek positif kelimpah Peresa EBA teulihka duai iku ari sida positif lalu siku agi negatif.

“Saspek diatu ditan enggau dibai ngagai IPD Kuching ungkup pansik bukai,” ku iya madah ngagai Suara Sarawak, kemari.

Tambah iya, operasyen nya mega ngeluarka 35 saman Polis, ari 257 asil pansik ngagai 57 buah perengka pengangkut enggau 83 individu penguna jalai alun.

“Entara penyalah ti ditemu ngagai sida ti disaman nyengkaum tujuh penyalah nadai nunjukka lisin deriba, tujuh penyalah bekaul lumur plat kerita ti enda nitihka spesifikasyen ke udah ditetapka enggau empat penyalah nadai ngelekatka chukai jalai.

“Kelimpah ari nya, penyalah trafik bukai iya nya nadai lisin deriba, ngubah ekzos kerita enggau nadai ngena tupi kaledar,” ku iya.

Kenu ku iya, pecah perengka pengangkut ti diperesa asil ari operasyen nya nyengkaum 32 buah kerita, 16 motosikal, enam buah 4WD enggau tiga buah van.