KUCHING: Ex-Bishop Gerija Wilayah Asia Tengara ke mega Bishop Anglikan Sarawak enggau Brunei Datuk Bolly dikeandal nyadi apai politik kudus ngagai kaban Parti Sarawak Bersatu (PSB) dikena nentuka semua pengawa ti digaga nitihka jalai ti betul sereta adil ngagai semua nadai ngira pengarap, ku Kaban Kaunsil Presiden PSB, Baru Bian.
Ku Baru, iya ngelala Bolly siku tuai ti chakah dalam aktiviti gerija sebedau iya nyadi Kaban Kunsil Nengeri (Adun) ba taun 2011.
“Aku temegah meda iya bejaku pasal penyedar enggau perati ngagai pemansang di luar gerija nyengkaum pekara politik.
“Nya kebuah iya ulih bejaku pasal pengidup, penanggul enggau isu kitai lebuh meri jaku ajar,” ku iya dalam siti penerang media tadi.
Ku Baru, pemerani Bolly lebuh ngelaban pengawa ti enda adil tauka penyalah dalam komuniti endang sebaka enggau bup kudus.
“Aku gaga meda Datuk Bolly bisi ati nyereta PSB ngambika ulih ngaul diri dalam sekeda isu baka hak Sarawak, penyerakup pupu raban bansa, pekara pengarap enggau ke bukai.
“Ba penemu aku, pekara ti dipilih iya endang seriris sereta engkeman enggau pemutus aku nyereta PSB taun nyin kemari,” ku iya.
Kelimpah ari nya, Baru mega madahka penatai Bolly dalam PSB engkeman lalu nya ulih ngubah peragam ngumbai orang badas enda ulih masuk politik ketegal politik endang kamah.
“Pekara ke nyata, politik tu ngaul semua pekara pengidup kitai nyengkaum hak bepengarap enggau pengelepas kitai.
“Nya alai, orang ke badas patut ngambi bagi ba politik dikena nentuka polisi enggau pemutus politik ke tegap ulih digaga ke pemaik semua.
“Kitai begunaka mayuh orang ke ulih ngubah dalam runding kelebih agi ba tanggungpengawa kitai ti chakah agi ngatur menua,” ku iya.
Baru nangkan ke nya, pechaya Bolly ulih nyadi apai kudus ngagai PSB awakka ulih ngatur pekara ti betul enggau adil.
Iya mega ngelaluka raban penyakal bukai baka SNAP enggau PBDSB nyereta PSB dalam napi Pengawa Beplilih Besai Nengeri (PRN-12) ti deka datai.
Kemari, Bolly ex-Bishop Gerija Wilayah Asia Tenggara ti mega Bishop Anglikan Sarawak enggau Brunei Darussalam madahka diri masuk nyadi kaban PSB.
