SIBU: Ketuai Polis Pelilih Sibu, ACP Stanley Jonathan Ringgit ningkah video ke dikerembai ba media rama ngayanka mensia mayuh begelumu ba mua Opis Wang Turu Pengereja Pengawa (KWSP) pampang Sibu kebendar ukai pekara ti nyadi kemari.
Ku iya, kemari video nya dikerembai ba media rama ngayanka mensia mayuh menuhka kaki lima KWSP pampang Sibu didawa deka ngerijista lalu ngeluarka akuan dua sida nya berita ke ditempa sengapa.
Lepas ninga berita nya, raban polis ditu terus matau tang nadai meda sebarang orang munyi ke didawa nya.
“Lebuh bala polis datai ba opis nya (KWSP) sunyi lalu opis nya mega bisi dilekatkan notis madah tutup sepanjai Atur Tagang Pejalai (PKP) tu,” ku iya lebuh dirandau pengarang berita kemari.
Nambah ke nya, ku iya ba mua opis nya udah nyemetak ditampal notis ba dinding opis madah ditutup kenyau 18 Mac nyentuk 14 April tu ila.
Ku iya, video lama nya dibantai piak ti enda mereti betuju deka ngajum mensia mayuh ngambika begedika piak bekaul.
Tu berindik ari penerang Menteri Besai Tan Sri Muhyiddin Yassin ke madah ulih mansutka duit sida nengah I-Lestari bepun ari 1 April tu tadi.
Ba I-Lestari nya, pengereja pengawa ke beumur 55 taun kebaruh dikemendar mansut ke duit sida sepenyampau RM500 sebulan sepengelama 12 bulan.
