Orang benggal terus nerima perati perintah

KUCHING: Raban komuniti orang benggal di Sarawak deka terus nerima perati ari perintah ngambika sida ulih ngembuan peneleba sereta ulih ngatika diri.
Menteri Pengintu Pengelantang Pendiau, Komuniti, Indu, Ruang Bilik enggau Pemansang Anak Mit Datuk Seri Fatimah Abdullah madahka perintah deka ngatur Program Intervensyen Tumu Nembiak Benggal seikas enggau nembiak ti ulih ninga.
“Dalam nambahka penemu enggau peneleba sida kitai deka meri sukung awakka sida ulih ngatika diri jemah.
“Kelimpah ari nya, kitai mega deka meri sukung pengelantang ngagai orang benggal enggau ruang bilik sida nengah latih, pengawa enggau dagang,” ku iya.
Fatimah bejaku munyi nya, pengudah ngatur penemuai basa begulai enggau Gerempung Orang Benggal Sarawak ngagai Kepala Menteri Datuk Patinggi Abang Johari Tun Openg di Wisma Bapa Malaysia ditu, kemari.
Ku iya, sida mega deka ngatur program penyedar bekaul orang benggal di menua tu nengah program Latih Jaku Orang Benggal (Bahasa Isyarat) enggau Penyedar Sentang Benggal ti bekualiti ngambika mensia mayuh sedar sentang gaya pendiau orang benggal ti napi penanggul komunikasyen lebuh gawa tauka ba palan mensia mayuh.
“Tuju kami endang ngambika orang benggal di menua tu ulih dilatih negapka peneleba, penemu sereta ulih ngatika diri jemah.
“Program Pemakai Amal ti digaga ninting taun endang enggau tuju ngumpul belanja awakk gerempung ulih meri pengelantang ngagai raban sida.
“Sekeda raban orang benggal udah lama gawa enggau manah ba palan ti nyukung sida baka KFC, kilang berau, kedai ruti, kedai jait, salun penganta enggau ke bukai,” ku iya.
Tandu Fatimah, sekeda orang benggal mega bisi ti gawa kediri baka ngaga gril, nyeruri rumah, betanam betupi enggau bekedai makai.
Ku iya, naka diatu penyampau orang benggal dalam gerempung nya manggai 300 iku.