Orang bumai patut nemu ngerebut peluang

SARATOK: Opis Menteri Betanam Betupi enggau Industri Pemakai (Mafi) udah ngagihka RM5.59 juta ngagai Sitak Pemansang Betanam Betupi Begempuru (IADA) Kalaka Saribas Betong.

Sapit Menteri Pengeluar Kuasa enggau Pengeraja Asal ti mega Kaban Parlimen Saratok, Datuk Ali Biju madahka agih belanja nya ungkup pemansang di Bagi Menua Betong nyengkaum sitak Saratok ba taun 2021.

Ku iya, raban orang bumai kena pegai ejensi nya ti bisi tanah ungkup dikemansang enggau projek betanam betupi patut ngerebut peluang ke bisi disediaka nya.

“Kita tau minta projek ti bisi pengulih besai enggau nerima peminta tinggi ukai semina ba makit menua tu aja tang mega makit produk luar baka produk agropemakai.

“Kandang menua tu endang bisi pengulih besai dikemansang enggau projek pemansang betanam betupi laban tanah ke ami enggau gaya hari ditu tau ngasuh utai tanam galak.

“Enti utai tanam tumbuh galak, asil agropemakai mega nambah lalu tu ulih nyungkak ekonomi kita ditu,” ku iya ba sebengkah penerang berita, kemari.

Ali madahka diri deka semampai betanyaka berita pasal program pemansang dikuasa raban IADA Kalaka Saribas Betong betuaika Direktor Tedong Bugak.

“Aku endang seruran betanya ngagai tuan direktor kitai pasal sebarang program pemansang dipejalai ba sitak Parlimen Saratok laban sida ke ngempu kuasa enggau matau pejalai program nya.

“Besai amat pengandal aku program manah baka tu ulih ngangkatka tikas ekonomi rama peranak ditu, mantu raban orang bumai nyadi pekebun ti mujur.

“Nya alai aku meri tabi puji ngagai tuan Tedong ti udah bejalaika pangku pengawa iya enggau manah lebuh meransang peranak ditu angkat nyadi komuniti ti bagas gawa enggau pintar runding ngena pengulih tanah sida,” ku Adun Krian.

Ngena peluang nya, Ali meri terima kasih besai ngagai Mafi ke udah ngemendarka agih belanja besai ngagai ejensi nya ngambi program diperambu ulih dipejalai.

Ungkup penerang, ba taun 2021 IADA Kalaka Saribas Betong udah ngemendarka 129 iku penyereta projek nanam nanas, nanam buah, betanam betupi integrasyen, nanam sayur, betanam ngena teknologi fertigasyen, industri nupi jelu, industri akuakultur enggau agropemakai ti meruan.

Nambahka nya, tanah 97 hektar pemesai mega udah dikemendar ngambi diperimba endur bejalaika program pemansang betanam betupi sepanjai taun 2021 tu.

Pengawa rejister penyereta enggau nyuaka surat ngemendarka projek udah dipejalai dua hari bejurut kena 11 enggau 12 March tu tadi.

MERAMBU PEMANSANG… Tedong berandau enggau bala penyereta IADA Kalaka Saribas Betong ungkup taun 2021 pasal program pemansang ke deka dipejalaika sida.

Suara Sarawak