Orang luar ditagang tama Betong

BETONG: Komiti Penyangga Penusah Bagi Menua Betong (JPBBB) enda ngasuh orang luar tama ngagai bagi menua nya sepemanjai musim pengerami Hari Raya Aidilfitri enggau Gawai Dayak.

Penyanding Penemu JPBBB Gerald Rentap Jabu madahka mensia mayuh dilalau diau aja ba rumah maya nya.

“Timpuh dua minggu tu amat mar lebuh kes majak nambah di Betong nyentukka ayan sekeda kluster baru.

“Nya alai, aku ngelalau ngambika kitai semua diau ba rumah dalam timpuh dua minggu tu.

“JPBBB enda ngasuh orang ari luar tama ke Bagi Menua Betong maya ngintu Hari Raya Aidilfitri enggau Gawai Dayak ti deka diintu enda lama agi,” ku iya.

Adun Layar mansutka jaku nya lebuh ditanya Suara Sarawak bekaul pengawa JPBBB nagang pengerekai penyakit Covid-19 di bagi menua tu, kemari.

Ku iya, sekat jalai alun mega deka diteritka ngambika nadai aktiviti neresa pelilih menua tauka pejalai keluar tama entara pelilih menua nyadi.

Kelimpah ari nya, ku iya, pejalai ‘circuit breaker’ mega deka ulih nagang semua aktiviti ari pukul 7.00 malam nyentuk 6.00 pagi ba palan ti ngembuan kes.

Bekaul enggau gaya kes di Kampung Beladin, iya madahka JPBBB merambu palan nya bejalaika Atur Mindah Betagang Diteritka (PKPD).

Taja pia, ku iya, pejalai PKPD tu agi nganti pemendar ari Komiti Penyangga Penusah Nengeri (JPBN).

“Tang pengawa ngiga kes ngerekai (ACD) benung dipejalaika enggau semua masegit sereta surau diasuh tutup nangika kes majak nambah.

“Aku ngarapka semua peranak menua meri kerejasama penuh awakka raban pengerai ulih mutuska rentayan penyakit nya sereta terus meh nitihka Atur Pengawa Standard (SOP) kelimpah nagang pengawa mindah,” ku iya.

Suara Sarawak