Orang Mexico, Ecuador rinduka keranjai jari Lawi

MUKAH: Pemuas meda pemanah keranjai jari bala kaban sebelah ruai Facebook meransang Lawi Ambrose nguji belajar nusuk leka manik.

Peranak asal Baoh Burak, Dalat tu madahka iya ngepunka dagang kraf tu dalam bulan March taun 2018.

“Nyau rindu meda pemanah keranjai jari bala kaban ba sebelah ruai Facebook nya .

“Dia deh aku teulihka runding deka nguji nusuk leka manik, tambah mega lebuh nya aku nadai agi gawa laban ke udah abis kunterik.

“Aku mega ngena puku diri empu lebuh ngepunka pengawa nusuk leka manik nyentuk diatu laban mupuk meli stok leka manik nitihka peminta enggau udar bala penguna,” ku Lawi ngepunka randau enggau pemberita Suara Sarawak.

ALUS… Pemanah tango moden digaga Lawi.

Ku Lawi, maya keterubah nusuk leka manik suba, iya semina nguji ukir manik ke muntang nya.

Pia mega, Lawi madahka iya nadai kala belajar nusuk manik ari orang bukai ngelama tu tang suah agi beratika chara nusuk manik ba Youtube.

Ari nya tadi, iya belubah nundaka chara ke muntang nusuk leka manik ti dibantai dalam Youtube nya.

“Pengudah nyau landik nusuk leka manik ke mudah nya, aku lalu mupuk begadai nguji bemacham ukir bukai tang minggu keterubah nya aku sigi agi nguji nusuk leka manik ke mudah dulu.

“Nyau sebulan baru bisi landik nusuk leka manik ngena bemacham ukir tang kitai mesti puh ba pengawa tu laban kadang enti bisi salah, mesti diubah enggau diadu baru magang.

GAYA MODEN… Lawi bisi ngaga tango enggau sumpin nunda gaya moden kelimpah manah dikena raban indu lebuh bisi pengerami.

“Ba Youtube nya mih aku mayuh belajarka chara nusuk leka manik lalu bisi mega nunda diagram lalu nguji bekayuh enggau belajar kediri dataika pengawa nya tembu enggau manah dipeda.

NARIT ATI

“Pengawa nusuk leka manik tu tau ngasuh rindang seraya ke nadai pengawa di rumah laban rindu ga meda pengudah keranjai jari digaga kitai nya udah tembu.

“Pengudah dua tiga bulan nusuk leka manik, baru bisi orang ngudar minta gagaka produk ari keranjai jari aku tu laban rinduka keranjai jari aku.

“Pengudah makin mayuh orang rinduka keranjai jari enggau ngudar produk nya, aku berengkah nyual produk krafjari nyentuk diatu,” ku Lawi nerang.

Lawi mega madahka pengawa nusuk leka manik tu bisi pemar iya lalu kitai mesti belubah nembuka siti produk enggaika bisi salah tusuk leka manik iya.

Iya mega madahka ulih nembuka siti produk nya dalam sehari enti ukir nya muntang digaga tang timpuh nembuka produk nya nitihka ukir enggau pemesai iya.

Nambahka nya ku Lawi, ukir ke pedis digaga enggau besai deka tembu ba timpuh empat ngagai lima hari baka tango moden nya mesti nitihka ukir dikedeka bala penguna.

Entara produk krafjari digaga Lawi iya nya tango moden, marik Orang Ulu, gelang kaki, gelang jari, anting, cincin, Dream Catcher, marik rosari sereta selampai sulam udah ditanda.

Lawi ti beumur 38 taun mega madahka produk krafjari iya tu kala ditanya peranak menua luar baka ari menua Mexico enggau Ecuador.

“Aku kala nerima udar ari Semenanjung Malaysia kelimpah ari ba menua tu empu baka ba Kedah, Selangor, Johor sereta Sabah.

TAU UJI… Barang sapa ti deka ngudar produk krafjari digaga Lawi tu, kita tau ngiga iya ba ruai Facebook, Lawi Ambrose engggau Instagram, lau wee ambrose.

“Kala mega produk krafjari aku tu narit ari peranak menua luar baka ari menua Mexico enggau Ecuador.

“Lebuh nya iya semina nanyaka rega enggau produk krafjari dijual aku tang randau naka nya aja.

“Tambah mega, aku apin nemu seling enggau chara ngelakuka produk krafjari tu ngagai menua luar,” ku Lawi nerang tang gaga nerima pesan ari menua luar ti rinduka keranjai jari iya.

Iya mega madahka penanggul ari sukut jaku dikena mega entara pemar iya enda ulih nangkup peminta peranak ari menua luar nya.

Lawi ngarapka dudi hari iya nemu agi chara ngelakuka produk tu ngagai makit entarabansa ngambi ngerembaika agi dagang krafjari tu.

PELASAR DIGITAL

“Naka diatu, aku nyual produk krafjari tu sebelah media rama baka ba ruai Facebook, Instagram enggau Whatsapp.

“Ba penemu aku, media rama nya entara pelasar ke engkeman endur kitai ngelakuka dagang kraf laban ba dia mih, bala penguna muntang meda keranjai jari kitai.

“Kitai bela nemu, mensia mayuh diatu tebal agi bekenaka internet dikena ngelakuka bemacham produk baka pemakai, produk krafjari enggau ke bukai.

“Ari nya, aku andalka media rama ulih nyadi pelasar ngerembaika agi dagang kraf tu ngambi dikelala orang ba serata dunya lalu ukai semina peranak ba menua tu.

“Kami pedagang kraf tu ukai semina deka ngelakuka produk kraf aja tang dekaka peranak ari menua bukai ngelala keranjai jari digaga pedagang di Sarawak

“Terima kasih mega ngagai Perintah Sarawak laban udah ngerandang digital ekonomi kelimpah ngemuntangka kami ngelakuka produk tu ngagai menua bukai.

UDAR DIATU… Lawi ngerasuk tango moden ke udah ditembu digaga iya.

“Sukung baka tu beguna amat ngambi kami ti baru ngepunka dagang tu makin maju belama sereta ngembuan mayuh pelasar digital nipakka pemansang dunya,” terang Lawi.

Berebak enggau nya, Lawi madahka iya berasai lantang ati laban ninting bulan bisi aja orang ngudar produk krafjari iya mandangka bisi orang rindu meda pengalus keranjai jari iya.

Terang Lawi, ari pengawa nusuk leka manik nya, iya diatu bulih untung manggai RM800 tang enti nerima mayuh agi udar, mayuh agi ga untung bulih iya.

“Untung diulih aku sebulan nya mega bepanggai ngagai peneras aku nembuka udar nya.

“Enti jampat tembu, mayuh agi ga untung laban ulih ngerumban udar ke lama lalu berengkah ngaga udar ke baru diterima,” ku Lawi tuchum lebuh nerang pasal pengawa dikerindu iya kenyau ari taun 2018 tu.

Ba pengujung randau, Lawi madahka barang sapa ti deka ngudar produk krafjari iya, tau ngiga ba ruai Facebook, Lawi Ambrose engggau Instagram, Lau Wee Ambrose.

Kelimpah ari nya, bala penguna mega tau telefon enggau Whatsapp Lawi ba lumur 0198986281 enti bisi tanya silik pasal produk krafjari iya.

PUH… Lawi madahka kitai mesti puh nusuk leka manik tu baka ngaga selampai sulam ke udah ditanda.

Suara Sarawak