SRI AMAN: Identiti tubuh mensia ditemu retung dalam sebuah kerita ti angus semak Nanga San, Jalai Brayun kena Hari Tiga dipelaba siku lelaki lunggar umur bansa China.
Tuai Polis Pelilih Sri Aman DSP Mathew Manggi madah, sida dipadahka pasal penusah nya urung pukul 10.30 pagi.
“Kami nerima kangau ari Palan Matau Bomba enggau Penyah Penusah Sri Aman ti madah ke bisi orang tepekul dalam entukar ke angus tisi jalai Nanga San, Jalai Brayun.
“Ari pansik tumu polis, orang ke retung nya dipelabaka lelaki China beumur 76 taun,” terang iya ba sebengkah penerang malam tadi.
Raban polis ku iya mega ngenukuka entukar ti angus nya sebuah kerita bansa Daihatsu enggau lumur plat QKF4336.
Iya madah baru, kes agi dalam pansik polis lalu nyentuk diatu dikumbai kes parai ngenyit.
Berindik ari nya, iya minta mensia mayuh ke bisi sebarang penerang bekaul penusah datai ngagai IPD Sri Aman tauka telefon ngagai pegawai mansik kes ASP Leonard Mallaca ba lumur 019-7509390 ngambi mantu pansik.
Mensia mayuh mega dilalau enda ngaga sebarang peragam tauka ngerembaika berita bula laban dikenangi tau ngasuh bala bukai irau.
