Padang bilun baru di Kapit enggau Betong tembu 2023

KUCHING: Perintah Sarawak diatu benung nyikap diri ngangkatka manah agi ubah pemansang ekonomi menua pesisir enggau penyambung kelimpah negapka pengelikun servis pejalai bilun di menua pesisir.

Sapit Kepala Menteri, Tan Sri Dr James Jemut Masing madah, nya alai Bukit Mabong enggau Bebuling entara dua sitak ke udah dipilih.

Ku iya, Kapit / Bukit Mabong udah dikelala nyadi jalai ditengah Servis Bilun Menua Pesisir (RAS) baru dibaruh Komiti Penerebai Bilun Malaysia (MAVCOM).

“Sitak ba Bukit Mabong udah dipilih lalu engkeman amat laban palan nya chukup jauh, rumah mensia mayuh tebal agi nyembuah iya nya diuan urung 50,000 iku mensia enggau pedis deka dilawa.

“Berebak enggau nya Bebuling di Spaoh dipilih bepelasarka timbal ari mayuh piak bekaul, sereta dikena ngemanah agi penyambung ari langit ungkup palan agroplitan ke pemadu besai di Sarawak iya nya ba pelilih Bukit Sadok,” ku iya madah nengah sebengkah penerang.

TEMBU 2023…Pelin Padang Bilun Bukit Mabong enggau Bebuling ke dipelaba tembu suku ketiga 2023.

Masing ke mega Menteri Infrastruktur enggau Pemansang Penyangkai Kapal madah, tu deka mantu dalam nyungkak asil betanam betupi ngambi bisi dieksport ari sitak nya.

Tandu iya, Padang Bilun Bukit Mabong deka digaga enggau ungkus RM173.5 juta disikap enggau jalai (endur angkat sereta terengkah) pemesai 790 meter pemanjai lalu disadang ulih endur bilun twin otter sereta bilun Cessna 208 ke ngembuan berat 3 tan.

Kenu ku Masing mega, Padang Bilun Bebuling beungkus RM91.4 juta benung digaga lalu dipelaba deka berengkah enda lama agi.

“Ungkup Bebuling, pengawa renggat tumu deka berengkah nitihka taga. Gaya tanah ba endur nya mega diperati manah lalu pengawa tu bisi pemar kediri lebih agi ba Bebuling.

“Kededua Padang Bilun Bukit Mabong ti nyendiaka perengka pengangkut kargo enggau penumpang sereta Padang Bilun Bebuling deka ngundan kargo begunaka awak urung 36 bulan endur tembu lalu dipelaba deka mupuk bejalaika pengawa ke patut end alama agi. Kami melabaka kededua padang bilun tu tembu ba suku ketiga taun 2023,’ ku iya.