Padang bilun Mukah tembu 2021

MUKAH: Padang bilun Mukah ke baru beungkus RM360 juta disadang tembu Januari 2021, ku Sapit Kepala Menteri Tan Sri Datuk Amar James Jemut Masing.

Ku iya, pengawa nya dipejalai tang tejanggal mimit ketegal pangka Atur Tagang Pejalai (PKP) tu tadi.

“Diatu pengawa ngaga padang bilun nya udah disambung baru lalu dipadahka deka tembu Januari taun baru (2021),” ku iya maya dirandau pemberita ba taba projek nya ditu, kemari.

Kenu ku iya, padang bilun baru nya ila deka nyadi palan pengangkut ke chukup besai guna ungkup pemansang menua Mukah.

“Tu mega deka nyadi penyambung ke beguna ngagai industri ke benung regas mansang di Mukah enggau kandang menua ke besemak,” ku iya.

Bela bisi datai Kaban Kunsil Nengeri (Adun) Jemoreng Datuk Dr Juanda Jaya

Padang bilun nya nyema udah tembu ila ulih endur bilun ATR terengkah dibanding Twin Otter jam ke diatu. Sebedau tu enti deka ke Mukah, mensia mayuh mega ulih ngena jalai darat ari Sibu, Oya enggau Igan nyengkaum ari menua Matu enggau Daro.

Mukah diangkat nyadi Bagi Menua Ke-10 kena 1 Mac 2002 – lalu asil banchi taun 2000 ngerikodka penyampau rayat ditu manggai 47,900 iku.

Pengawa ngangkatka Mukah nyadi bagi menua siti basa ke chukup besai ngagai rayat mayuh ditu ketebal agi diuan bansa Melanau.

Ditu mayuh palan ke mayuh narit ati mensia mayuh ke rindu raun baka nyepi pemakai baru ari tasik enggau meda Pengerami Kaul ke diatur ninting taun.

Suara Sarawak