Palan bedaja mit di Batu 7 deka digaga pun taun baru

KUCHING: Kaunsil Kandang Menua Padawan (MPP) deka ngaga sebuah palan bedaja mit di Batu 7 (berimbai enggau kedai 688) ti beungkus RM2.5 juta pun taun baru (2021).

Chairman MPP Lo Khere Chiang madahka orang bedaja ba pelilih Batu 7 udah sekut.
“Projek ke beungkus RM2.5 juta tu udah dikemendarka Kepala Menteri (Datuk Patinggi Abang Johari Tun Openg) lalu dipelaba tembu dalam timpuh setaun.

“Kami deka meri palan bedaja baru nya ngagai sida ke diau ba genturung Dun Batu Kitang enggau MPP dulu ti mai asil betanam betupi ari kampung sida,” ku iya.

Iya bejaku munyi nya lebuh ditanya pemberita ba Pengerami Makai Lemai Gerempung Orang Bedaja Kaunsil Mengeri Kuching Selatan (MBKS) enggau Gerempung Orang Bedaja Batu 3 ba sebuah restoran ditu, kemari.
Kenu ku iya, palan ti dipelabaka ngundan urung 30 buah palan bedaja nya ila enda ulih diberi ngagai semua orang ke bedaja ba pelilih Batu 7 ketegal enda kelalu besai.

Kelimpah ari nya, Khere Chiang ti mega Adun Batu Kitang madahka MPP endang udah bisi perambu deka ngemesaika Palan Bedaja Batu 7 enggau Palan Bedaja Batu 3 ba baruh Langgur Pemansang Malaysia Lumpar ke-12 (RMK12).

“Palan bedaja tu udah tuai urung 30 taun lalu orang bedaja dia mega majak nambah.
“Nya alai, udah datai maya palan bedaja nya dikemesaika laban udah enda tetangkupka pemayuh mensia ketegal peranak ba Dun Batu Kitang enggau MPP majak nambah,” ku iya.

Nangkan nya, bejaku pasal pengawa makai lemai ti diatur ensana, Khere Chiang madahka iya amat gaga laban Gerempung Orang Bedaja MBKS enggau Gerempung Orang Bedaja Batu 3 sama saum ati ngambi peluang berandau sereta mutarka isu ti bekaul enggau pekara sida.

“Aku ngarapka pengawa ti baka tu deka nyadi chunto ngagai palan bedaja bukai laban nengah kerejasama gerempung bedaja baka tu deka ngemuntangka agi pejalai sida berandau enggau kaunsil sereta ejensi bukai.
“Bala orang bedaja mega bisi nerima bantu ari Perintah Sarawak (Bantuan Khas Sarawakku Sayang), nya alai aku ngingatka bala sida ngambika ngenang pekara manah ti udah digaga perintah ti betuaika Abang Johari enggau Perikatan Nasional (PN),” ku iya.

Sama bisi datai ba pengerami malam nya Chaiman Gerempung Orang Bedaja MBKS Tan Choon Yong enggau Chairman Gerempung Orang Bedaya Batu 3 Ho Yen Choon sereta bala bukai.

Suara Sarawak