BUNG Bratak mai reti bukit Bratak dalam jaku Bidayuh lalu tu nyadi kelai siti ari bukit ti pemadu tinggi ba sitak nya lalu bisi tujuh buah rumah panjai kala didiri ba endur nya kelia.
Diatu palan nya dikemansang ba Kampung Tembawang Sauh, Jalai Bau-Lundu, Bung Bratak udah diangkat nyadi siti ari produk dagang temuai ti udah ditetapka UNESCO ungkup sida ti rindu enggau pengawa hiking seraya meda rampa menua di pelilih menua Bau ti manah.
Bung Bratak sebedau tu ditutup sementara ungkup mensia mayuh laban betatika pengelikun raban komuniti ba sitak tu sekumbang pandemik Covid-19 ti majak ngerekai sepengelama tu.
Palan tu udah dikelala nyadi siti palan pesaka ti ngundan mayuh sejarah di menua Sarawak.
SEJARAH
Bung Bratak diuan siti genturung pendiau diuan komuniti Bidayuh Jagoi kenyau ari 750 taun ke udah.
Urung taun 1838, endur tu kala diserang orang luar lalu semua genturung pendiau ditu angus ditunu lalu sida ke tuai enggau biak ke diau dia balat tasah kelimpah ngelarika diri ngagai endur ke lebuh likun.
Maya penusah tu nyadi, Panglima Kulow enggau bala rayat iya ti bukai benung gawa bumai ba kaki bukit enda jauh ari palan nya.
Berebak enggau nya, Panglima Kulow ke nyadi ketuai sida udah minta bantu ari Rajah James Brooke lalu mujur mai pulai rayat sida ke udah ditaban orang luar suba.
Sepengudah pengawa nya, Bung Bratak udah digaga baru nyadi siti genturung pendiau komuniti Bidayuh ti baru lalu rayat dia begulai enggau likun.
Taja pia, kemaya tu komuniti bansa Bidayuh udah pindah niri ke genturung pendiau di menua bukai.
Diatu Bung Bratak udah dipilih nyadi siti palan dagang temuai di Sarawak kelebih agi nuju sida ti rindu ke pengawa hiking maya lepa.
Pengerami Bung Bratak diatur kena 1 Mei ninting taun dikena ngingatka penusah bekaul sejarah ti udah kala nuntung komuniti Bidayuh Jagoi ba sitak tu.
PEMANAH RAMPA MENUA
Rikod peninggi tuchung Bung Bratak iya nya 1000 meter ari paras tasik. Kena datai ba penyangkai ke ba tuchung bukit tu, mensia mayuh ulih neruska pejalai sida nengah belakang palan ngirup tauka palan ngetu ba sitak tu.
Mensia mayuh ke udah datai ba tuchung bukit tu mega ulih meda genturung pendiau komuniti Bidayuh ti ba kaki bukit tu seraya ke meda garis menua entara Sarawak enggau menua Indonesia.
Nangkan ke nya, ditu mega bisi dua buah rumah panjai ti digaga ngena buluh dibuka ngagai mensia mayuh ti deka bemalam enggau sebuah Baruk ke nyadi kelai main asal komuniti bansa Bidayuh.
Bung Bratak mega baka bukit ti bukai ngembuan ai wong ke nyadi pun ai ngagai komuniti ti diau ba sitak tu.
Diatu mayuh macham perengkaguna ti bukai baka disikap enggau dewan alai begempuru, opis komuniti enggau muzium mini ti mandang gaya idup komuniti Bidayuh Jagoi mega ulih dilawa mensia mayuh ti datai nemuai.
PEJALAI NUJU BUNG BRATAK
Mensia mayuh ulih paking entukar sida ba baruh kaki bukit Bratak, Kampung Tembawang lalu hiking nengah tangga ti digaga ari kayu tebelian enggau buluh sepengelama 20 ngagai 30 minit.
Rampa menua ti chukup manah dipeda nuju ngagai Bukit Singai enggau Bukit Serapi sepemanjai jalai niki ke tuchung bukit tu.
Nangkan ke nya, semina entukar besai 4×4 tauka motorsikal aja ulih nengah jalai bukit tu laban tebiang bukit tu tinggi.
Bayar tama ngagai endur tu semina RM5 ungkup peranak Malaysia lalu ukai peranak Malaysia deka mayar RM10.
Bayar tu enda nyengkaum enggau bayar bekena ka perengkaguna ti bukai. Baruk, rumah panjai, dewan makai, dewan begempuru enggau endur bemalam berega sepenyampau RM90 siku nitih pengelama diau ba endur nya.
Kena nyukung pengawa eko dagang temuai komuniti, Bung Bratak ti majak tebilang ungkup aktiviti hiking deka dibuka baru ngagai mensia mayuh bepun 1 November 2021.
Ngagai mensia mayuh ti deka nemuai ngagai endur tu, jam endur palan tu dibuka iya nya bepun ari pukul 8 pagi nyentuk pukul 4 lemai.
