KUCHING: Konsortium Sarawak-Singapore bekerejasama numbuhka FutureData Sdn Bhd di Kota Samarahan lalu nyadi palan datai pemadu besai keterubah di Borneo.
Tuai Pegawai Eksekutif Gerup TSG Green, Datuk Chris Chung madah, pekara nya enggau tuju ngasuh Sarawak nyadi moden inovatif ungkup palan data gadung enggau nempa pemansang industri sereta rayat ba menua tu.
“Serikat baru tu deka nengkebang, nempa enggau ngemansang palan data gadung neutral karbon pemadu maju ke mega teknologi pintar kuasa penyampau 200 megawatt (MW).
“Tu ukai semina nyadi palan datai besai keterubah di Sarawak tang mega di Borneo.
“Udah datai maya kitai nyerungkai jauh agi pengulih menua tu nengah penemu positif industri palan data menua enggau nangkup peminta servis mensia mayuh di rantau tu,” ku iya.
Chris mansutka jaku nya ba Pengerami Makai Lemai Gala ‘Shape the World Summit Programme 2023’ di Hotel Pullman Kuching, 21 June tu tadi.
Ku iya, projek nya dipejalai begulai enggau bakih kunsi teknikal sida, Cycle Group of Singapore enggau serikat nya mega nyadi penyedia pemutar injining meruan ba bemacham disiplin.
Iya madah, sida sida diatu benung ngemansang model palan data nitihka pematut.
“Nya kebuah, nengah kerejasama Cyclect enggau 800 staf kami ti bisi peneleba bejalaika projek, kami bisi chara engkeman nentuka bakih kunsi antarabansa nengkebang enggau netapka fasiliti sereta operasyen palan data ti nangkup peminta bebida.
“Palan data tu deka dikemansang ba pelilih gadung baru dikumbai Pelilih FutureGreen ke alai pengawa nyaga pengerai, pelajar, rumah mar rega ungkup bakih di menua luar ngiga rumah kedua di Kuching.
Semua tu dikuasa infrastruktur gadung baka bejalaika pekeliling ekonomi enggau ngasilka kuasa gadung ari genap tuai bilik ke ulih nyambung ngagai grid,” terang iya.
Nambah ke nya ku Chris, tu mega deka nyadi Pengidup Gadung nengah langkar sistem mungkur kuasa, gaya idup, ngena baru enggau baka ni gaya idup gadung versyen Sarawak ulih ditempa.
“Tu deka begunaka kitai ngubah chara runding enggau ulah.
“Nengah projek tu, TSG ngarap ulih bejalaika pemansang meruan ti maju enggau ulih ngangkatka Sarawak nyadi mengeri siber, mengeri gadung ungkup idup, gawa enggau bemain, ngayanka palan data gadung sereta nyendiaka kereja gadung nyengkaum digital ungkup rebak biak,” ku iya nerang silik.
Kelimpah ari nya, Direktor Pengatur Pengawa Gerup Cyclect, Melvin Tan madah, palan data di Sarawak nyadi tulang belakang ekonomi digital, nyimpan, nginjin enggau nganjung mayuh data ungkup e-dagang, media rama, cloud computing enggau striming.
“Sida mega ngerandang pemansang Artificial Intellegence (AI) nentuka mesin bejalaika pengawa pintar baka nemu batang jaku enggau deriba entukar kediri,” ku iya.
Ungkup rikod, pengawa ngelanchar FutureData Sdn Bhd nya mega udah dipenyadi Premier Sarawak, Datuk Patinggi Tan Sri Abang Johari Tun Openg ba pengerami makai lemai gala nya.
