Palan karaoke bebilik ba kedai besai dikemendar dibuka berengkah pagila

KUCHING: Komiti Penyangga Penusah Ngenyit (JPBNS) ngaga pemutus ngemendarka palan karaoke bebilik ba kedai besai ulih dibuka berengkah pagila (23 Disember).

Ba penerang Opis Menteri Kaunsil Kandang Menua enggau Pengawa Berumah udah beratika SOP muka palan karaoke bebilik ba kedai besai.

Taja pia palan KTV Karaoke, Kelab Malam, Pub enggau Bistro apin dikemendar dibuka.

Sehari tu, Sarawak nadai ngerikod kes baru positif lalu ngujungka kes positif mengkang 1,090 kes.

Nangkan ke nya, empat kes baru udah suman enggau dikemendar pansut ari Sepital Besai Sarawak (SGH) ngujungka bisi 1,060 iku udah suman tauka 97.25 peratus.

Naka kemari mega, bisi 11 iku agi dperubat ba wad isolasyen ke alai tujuh iku ba SGH, tiga iku ba Sepital Sibu enggau siku ba Sepital Miri.

Dua PUI baru dirikodka kemari enggau dua PUI agi nganti pemutus peresa makmal.

Suara Sarawak