KUCHING: Sarawak merambu ngemansang palan konvensyen baru ti ulih dikena ngatur sebarang pengerami dagang besai tauka pengerami merindang renggat menua enggau antarabansa dudi hari.
Menteri Dagang Temuai, Industri Kreatif enggau Seni Pemerindang Sarawak, Datuk Seri Abdul Karim Rahman Hamzah ngarap ke palan konvensyen baru nya ulih ngundan abis nadai 10,000 pengusung ba genap pengerami.
“Laban palan konvensyen ti bisi diatu di Kuching kelalu mit, nya kebuah kami merambu numbuh palan ke besai agi,” terang iya.
Karim bejaku munyi nya ba aum pemberita pengudah bejadi Pengerami Muzik Kampung Ujan Dunya 2023 (RWMF2023) ke deka datai, ditu kemari.
Ku iya, begunan bukai baka Stadium Perpaduan mega ulih nyadi palan ngatur pengerami merindang.
“Kelimpah ari nya, enti sida deka ngatur pengerami merindang, nya endang penemu ti pintar enti kitai ngatur nya ba sebengkah endur tengan taun laban ba pun taun ngagai tengan taun suah ujan,” ku iya.
Sebedau tu, Datuk Gerald Rentap Jabu ngarap ke diri ulih meda Sarawak ngatur pengerami besai ba Stadium Nengeri ditu.
Sapit Menteri Nembiak, Lumba enggau Main sereta Pemansang Orang Dagang nya madah, stadium nya ukai semina ulih ngatur pengerami lumba enggau main tang mega pengerami merindang.
“Lebuh kitai nyikap diri napi Lumba Malaysia (Sukma) taun ti deka datai, kitai benung meda perengkaguna ti meseti diseleti enggau dikemanah baru.
“Tang ukai semina ungkup Sukma aja, jemah ila kitai mega deka meda Stadium Sarawak ulih ngatur pengerami besai,” terang Rentap.
