KUCHING: Palan latih ungkup main powerlifting deka diseruri ungkup guna raban atlit ti ngena palan latih nya.
Menteri Muda Pengintu Pendiau enggau Pengelantang Komuniti Datuk Francis Harden Hollis madahka bekau ari atap tiris palan latih nya bisi napi penanggul perengkaguna jai.
“Aku empu datai meda sereta ngelala nama bagi bantu ti deka diberi empas ari atap palan latih tiris lalu ngujungka perengkaguna bukai bisi jai.
“Palan latih tu beguna dikena nyikap raban atlit powerlifting Orang Nyelai Pendiau (OKU) nyereta Pekit Para Powerlifting Dunia di Georgia, Russia kena bulan November tu ila,” ku iya.
Harden bejaku munyi nya dalam siti penerang pengudah ngabas palan latih powerlifting ditu, kena 28 September tu tadi.
Ku iya, palan latih nya mega ti udah ngemansutka jaguh para power lifting menua iya nya Bonnie Bunyau Gustin enggau Jong Chee Khie ti udah mujur bulih midul emas ba Pekit Paralimpik Tokyo 2020 tu tadi.
Sama bisi datai, Jurulatih Powerlifting Jamil Adam, Penulung Pemesai Nembiak enggau Lumba ari Pemansang Lumba Sarawak (SSC) Mohd Amirul Zaini enggau ke bukai.
Berebak enggau nya, Harden mega sempat betemu enggau atlit gumpal isi menua Buda Anchah ke mega asal ari Sri Aman.
Buda kala ngerikodka gela champion ba mayuh kategori kenyau iya ngaul diri dalam lumba berengkah taun 2007.
