SEBUAH palan ngelantang ati ti patut dilawa mensia mayuh iya nya Jong’s Crocodile Farm and Zoo ba Bagi Menua Siburan.

Jong Crocodile Farm and Zoo nya sebuah kebun baya ti chukup tebilang ba Sarawak lalu ti keterubah enggau pemadu besai ba Malaysia.

Kebun nya urung 31 kilometer (km) tauka 35 minit penyauh ari indu mengeri Kuching, 1.6km ari Pasar Siburan sereta 34km ari Pasar Serian.

Kebendar, kebun nya dipungkal siku orang ti benama Yong Kian Sen ba taun 1979 sereta meruan bisi nyentuk sehari tu.

Iya berengkah ngumpul bemacham bansa baya ba taun 1963 lalu ditupi ba tanah urung satu hektar pemesar nya.

BEMACHAM BANSA JELU
Bemacham bansa baya bisi ditupi ba kebun nya lalu naka diatu, penyampau baya dia dipelaba manggai 1,000 iku.

Bala pengusung ti ngelawa kebun nya ukai semina ulih meda baya aja tang ulih meda jelu bukai ti bela ditupi ba kebun nya.

Nya nyengkaum rusa, jugam, jani kampung, burung ruai, menaul, kera, lelabi, ular sawa, ikan Arapaima enggau mayuh agi ti bukai.

Pia mega, pengusung bepeluang meda pemanah rampa menua gadung ba kebun nya enda nyalah baka ba kampung jerung ti diuan mayuh jelu siga.

BUJANG SENANG
Sebedau bala pengusung tama ke dalam agi ngagai Jong’s Crocodile Farm and Zoo meda baya enggau bemacham jelu siga ti bukai, sida deka mansa sebuah muzium mit ti mandangka turai sejarah senentang baya ba menua tu.

Sida mega deka temegah enggau alit ati meda pemesai keruntuk pala Bujang Senang ti bisi dipandang ba muzium nya.

Kenu ku cherita tuai, Bujang Senang nya siku bujang berani Iban benama Simalungun ti bebali nyadi baya nguan Sungai Batang Lupar.

Simulungun chukup kering enggau berani lebuh bekayauka munsuh. Bala munsuh pechaya iya bisi ngembuan penemu ngasuh kebal.

Nya alai, munsuh ngelalaika bini iya dikena ngelala pengelemi dikembuan Simulungun. Laban ti sayau ke bini diri, dia deh Simulungun datai ngagai Sungai Batang Lupar ngiga bini iya.

Simulungun nadai kebal enti iya ba ai lalu pekara nya ditemu munsuh. Nya alai, sida mujur munuh iya ba sungai nya nyengkaum bini dikesayau iya.

Bala petara ngaga kereja ajih ngagai tubuh Simulungun enggau bini iya lalu seduai bebali nyadi baya.

Simulungan bebali nyadi Bujang Senang beserimbai enggau nama Sungai Senang ti bepati ba Sungai Batang Lupar.

Berengkah ari nya meh Bujang Senang suah nyerang mensia mayuh ba tebing sungai nya ketegal deka malas dendam.

Bisi sekali, Bujang Senang mujur ditimbak raban polis ketegal munuh siku peranak dia lalu keruntuk pala iya disimpan ba Jong’s Crocodile Farm and Zoo nyadi pengingat.

Nemu kita? Bujang Senang nya sekeda ari baya pemadu besai ba dunya.

MERI BAYA MAKAI
Pengawa meri baya makai, nya sebengkah pekara ti seruran dianti bala pengusung lebuh ngelawa Jong’s Crocodile Farm and Zoo.

Bala staf kebun nya deka meri baya dia makai dua kali sehari iya nya pukul 11 muak ke pagi enggau pukul 3 muak ke lemai.

Kelimpah ari nya, pengusung mega bepeluang meda enggau ngasaika peneleba meri ikan Arapaima makai pukul 11.30 pagi enggau 3.30 lemai.

Kebun nya dibuka ninting hari nyengkaum Hari Besai berengkah ari pukul 9 pagi nyentuk 5 lemai.

Bayar tama kebun nya RM20 ungkup orang tuai besai lalu RM10 ungkup nembiak mit ti beumur tiga nyentuk 11 taun.

Pia mega, anak mit ti beumur baruh ari tiga taun enggau Orang Nyelai Pendiau (OKU) nadai bebayar tama kia.

Enti peranak menua luar, bayar tama kia iya nya RM30 ungkup orang besai tuai enggau RM20 ungkup nembiak mit.

BUAH JARI
Sebedau pengusung mulai ke diri ari palan nya, sida ulih bebelika sekeda buah jari ngambi bisi dibai pulai diberi ngagai diri sebilik, bala bakih tauka ungkup diri empu.

Ba sepiak kaunter rejister tama ngagai Jong’s Crocodile Farm and Zoo nya bisi sebuah palan nyual bemacham produk.

Nya nyengkaum pekayan sereta produk kraf jari baka gelang, marik, ketapu, kantung, buah kunchi enggau ti bukai.

Pengusung patut meli produk nya ke tanda sida kala ngusung kebun nya tauka nyadi buah jari.

NGEDUT KAUL
Nya alai, Jong’s Crocodile Farm and Zoo sebengkah palan ti chukup engkeman dilawa mensia mayuh begulai enggau diri sebilik.

Bala apai indai patut mai anak ngusung palan nya ngambi sida ngelala bemacham bansa jelu siga ti bisi ba Sarawak kelimpah ngedut kaul enggau diri sebilik.

Raban sekula mega patut napatka palan nya lebuh mai bala nembiak nemuai seraya belajar.

Ari nya, bala nembiak sedar menua kitai ngembuan pengaya bidodiversiti nyengkaum bemacham jelu siga enggau utai tumbuh.

Tebal agi nembiak rebak dudi ada lalu besai ba mengeri, nya alai, kebun nya meh peluang sida ngelala jelu siga enggau utai tumbuh ba kampung jerung ti chukup jarang dipeda.

Kebun nya ukai semina ditapatka rayat menua tu empu tang rayat menua luar mega.

Bala pengusung ti ngelawa kebun nya deka tepantup ati meda bemacham jelu siga ba kebun nya.