SERIAN: Palan Ngumpul, Proses enggau Mungkus Tarat dipelaba deka dibuka dalam bulan November taun tu.
Kebuah pia, laban pengawa ngumpul enggau nyimpan rambau musim buah nyangkaum buah rian deka betambah lalu sida ke nyual buah rian ulih nyual laluh buah sida ngagai palan nya, ku Sapit Kepala Menteri Datuk Amar Douglas Uggah.
Iya madah munyi nya rambau ngabas palan nya lalu beratika tikas pemansang pengawa ngaduka palan nya kemari.
Kenu ku iya, palan nya ngembuan perengkaguna dikena nginjin nitihka standard entarabansa enggau ngembuan Setipikit Pansik Pengerai enggau Penagang Pemedis (HACCP) dikena ngemendarka Sarawak ngudar isi rian terus ke China.
Iya ke mega Menteri Betanam Betupi Moden, Pemansang Tanah Asal enggau Kandang Menua madah, Sarawak andal ulih nyual 200 tan isi durian ke China maya musim buah ke deka datai.
Iya mega madah naka taun tu, Sarawak mujur nyual 100 tan ke menua nya lalu madahka penyampau peminta ari menua China seruran betambah.
Sama bisi datai nyempulang Uggah iya nya Direktor Opis Betanam Betupi Dr Alvin Chai enggau Sapit Direktor Ngap Dollah.
