Palan Tabika, Taska Kemas di Betong deka dibuka minggu baru

BETONG: Bisi 1,343 iku anak mit ba Tabika enggau Taska Opis Pemansang Mensia Mayuh (Kemas) Bagi Menua Betong deka berengkah masuk kelas enti palan nya dibuka minggu baru.

Pegawai Kemas Bagi Menua Betong, Md Asdi Hamdi madahka Kemas mega deka dibuka laban sekula deka dibuka baru kena 1 March tu.

“Ba Pelilih Betong, bisi 46 buah tabika enggau tiga Taska deka dibuka minggu baru ngaul 586 iku anak mit.

“Ba Pelilih Saratok, bisi 757 iku anak mit deka besekula ba 79 buah tabika enggau tiga taska,” ku iya nerang.

Asdi mansutka jaku nya lebuh ditanya pasal operasyen Tabika enggau Taska Kemas ba Bagi Menua Betong, ditu kemari.

Iya mega madahka apai indai anang irau nganjung anak sida ke kelas.

Ku Asdi, kebuah pia laban sida deka nitihka Atur Pengawa Standard (SOP) baka dalam Atur Muka Baru Tabika enggau Taska ti dsadung ngagai semua pengajar Kemas.

Iya madahka pengajar udah meresi enggau sanitasyen tabika enggau taska sebedau dibuka kena 1 March tu.

“Sida diatu ba renggat kepenudi meresi lalu tu mandangka Kemas ngemeratka isu pengelikun ba kelas ti dikena.

“Genap tabika enggau Taska mega mesti nyendiaka abis nadai siti kereban pengangat isi ngambi meresa pengangat isi anak mit sebedau tama ke kelas.

“Sida mega dipinta ngaga tanda nyaga takah dalam kelas ngambi bala anak mit nitihka kelai nya,” terang iya.

Nambahka nya ku Asdi, iya mega deka matau enggau Penyelia Pelajar Tumu Anak Mit nentuka Tabika enggau Taska kemas ti dibuka abru nya lanchar dipejalai nitihka SOP enggau atur ti udah ditetapka.

Suara Sarawak