ARTIKEL

Pandelela enda pudar semangat

Facebook
Twitter
LinkedIn
WhatsApp
Telegram

JOM BACA E-PAPER SUARA SARAWAK/ NEW SARAWAK TRIBUNE PERCUMA SEAWAL 2 PAGI SETIAP HARI. KLIK SINI

KUCHING: Sempama baka tekura enggai enda tepantup di bandir ngenyemaka semangat ratu terejun menua, Pandelela Rinong Pamg, 28 taun.

Semangat nya nipakka jaku peransang idup dipegai iya empu, Anang mantul ngapa nyapai juluk ati nuan, lurus ati sereta siruka orang bukai.

“Aku endang enda mudah mantul ngapa taja puntan mai sebarang midul ba Lumba Olimpik Tokyo 2020 tu tadi.

“Udah tu, ransing enggau bebendar agi ga belatih dikena nyikap diri ba sebarang pekit terejun udah tu ila lalu nempa pemujur baka dijuluk ati ngelama tu,” ku iya.

Pandelela ti siru agi dikangau Lulu madah munyi nya lebuh dirandau raban pemberita pengudah tembu Pekit Terejun 10 Meter Platform Individu Indu Renggat Kepenudi di Tokyo, ensanus.

ASA… Mua Pandelela berupai asa meda puin diulih iya ari pengilap ba terejun keterubah.

Iya madah, nadai kala terunding deka ngalahka diri lalu surut ketegal ‘alah’ sekali tu tang peneleba bepekit tikas dunya nya kebendar ngeringka agi semangat maju dalam pekit dikerinduka iya nya.

“Aku enda deka mantul enggau surut ngapa. Aku deka nguji baru. Belatih bebendar agi lalu bepekit enggau manah agi ba pekit udah tu ila. Tang ba pekit ni, dini enggau kemaya nya empai temu.

“Semina aku deka madahka diri endang enda mudah mantul seagi juluk ati apin tejapai, ngulihka midul emas ba Lumba Olimpik.

“Sempama baka tekura enggai enda tepantup di bandir laban enggai ngelebu diri empu, kami sebilik enggau semua orang ti udah andalka aku ngelama tu,” ku Pandelela madah baru.

Ba renggat kepenudi pekit diatur ba Palan Akuatik Tokyo nya, pengilap ba terejun keterubah ti semina meri 18 puin aja tang iya nebus pengilap nya ba terejun kedua enggau 71.05 puin.

RATU TEREJUN MENUA… Pandelela Rinong Pamg

Udah nya iya bulih 60.80 puin ba terejun ketiga enggau terejun keempat diberi 52.80 puin lalu nembuka terejun kelima nerima 43.20 puin.

Anak dara Pamg Joheng enggau Hartini Lamim ari Kampung Jugan di Bau nya teulihka 245.85 puin ari lima terejun ba penuduk ke-12 ari 12 iku pemekit renggat kepenudi.

Pandelela mega madahka diri nerima enggau ati lantang ke pengilap ba terejun keterubah taja iya udah meri fokus enggau bebendar lebuh belatih sebedau nurun bepekit ke Tokyo.

“Agi tegepang laban nadai nyangka tau (silap) nyadi baka tu laban lebuh belatih nadai kala ngaga pengilap, tang lebuh bepekit nyau lain utai ke nyadi.

“Nadai ku enggau, terima aja meh enggau ati lantang munyi ku aku tadi. Udah tu bebendar agi matih diri empu ngambi badu agi nandu pengilap nya,” ku Pandelela.

Dulu ari nya, Pandelela bepadu enggau Leong Mun Yee mega puntan mai sebarang midul ngagai Malaysia ba Pekit Terejun 10 Meter Platform Seirama Indu pengudah semina bulih penuduk lumur lapan.

Seduai ngepunka pekit enggau puin ke manah tang ngaga pengilap ba tiga terejun kepenudi ngujungka seduai semina teulihka 277.98 puin aja.

Info grafik

BERITA LAIN

Nempa Sarawak nyadi tibang pemakai

TUSUN KETERUBAH MINAT Reynold anak Jacktola, 29, ti rindu agi dikangau Nol ba pengawa betanam betupi nya endang dikembuan iya ari mit laban iya datai

Tebing Sungai Saratok deka diseleti meruan

SARATOK: Perintah Sarawak deka nyeleti pengkalan ba seberai Pasar Saratok enggau jematan dikena ngelayang Sungai Paon. Kaban Kunsil Nengeri (ADUN) Kalaka, Mohamad Duri madah, sepenyampau

BERITA TERBARU