Panggau Dayak dikearap mujur didiri

Raban bansa Dayak endang udah lama ngining deka bisi begunan ke diri empu lalu diatu kitai bela ningga kena 2 Nov tu tadi, dia Sarakup Main Asal Dayak (DCF) dipadahka deka bisi begunan kediri diberi nama Panggau Dayak.

Berita manah tu dipansutka Chairman DCF,Tan Sri Leonard Linggi Jugah rambau Simposium Ngepan Iban (SNI) 2019 di Betong lalu pekara tu nerima sukung penuh ari Sapit Kepala Menteri Datuk Amar Douglas Uggah Embas.

Begunan tu ila deka bisi ngembuan semilan ringkat alai mandangkan ngepan tradisional bansa Iban, Bidayuh enggau Orang Ulu.

Nitihku Uggah, Perintah Nengeri udah meri pemendar bekaul enggau perambu tu lalu bisi sebidang tanah udah diberi ba Jalai Ong Tiang Swee di Kuching dikena ngemujurka perambu tu.

Ku iya, diatu pengawa benung ba renggat nyungkur taba endur nirika begunan tu. Penemu begunan tu jemah deka meri pemaik bisi alai nyimpan ngepan asal ngambika keresa nya seruran dipeda komuniti Dayak lebih agi raban rebak baru.

Nadai tau rumbau

Kitai bela besampi ngarapka juluk tu nyadi nyata lalu enda tau rumbau baka ke udah laban nya deka ngujungka mayuh petenah tauka sebarang jaku ti enda manah ayan ketegal nadai gempung tauka pengering sukung ari semua piak.

Sebedau tu, dalam taun 1997 kitai Dayak endang bisi perambu numbuhka Rumah Dayak dibaruh iring Komiti Rumah Dayak betuaika Dr John Brian Anthony tang nyentuk sehari tu projek tu terus nyadi tembawai bepalan ba Jalai Satok.

Projek Rumah Dayak tu menya diperitaka tejanggal ketegal penangggul ke enda ulih diseliah nyengkaum pelin begunan enggau langkar pendiau begunan ke enda dikemendar piak kaunsil kandang menua maya nya.

Serakup Bansa Dayak Sarawak (SDNU) ke nyadi pemungkal ngagai projek Rumah Dayak nadai ulih ngaga sebarang pengawa laban projek tu udah diserah ngagai raban kunterita bekaul.

Ngelansa pasal projek tu, sebengkah aum udah disain entara SDNU enggau kunterikta ba taun 1997, bekau ari sempekat nya dia kunterika diberi 80 peratus ari pemenggi reta llu SDNU nerima 20 peratus.

Kunterik projek udah nya diserah ngagai kunterikta bukai lalu pengawa ngaga Rumah Dayak nya puntan ketegal penanggul ti pedis diterang.

Pengudah tiga kali baum begulai enggau kunterikta, dia timpuh nyambung pengawa dilanjar ngagai 29 Januari 2009 tang sekali agi projek ke beungkus urung RM8 juta nya puntan nitihka haribulan ke udah disemaya.

Nya mih penanggul ke ditapi ngujungka nyentuk sehari tu, Rumah Dayak semina bisi didinga nyadi buah mulut ba sebelah pasar tauka sebarang alai tang mengkang nadai dipeda ba mua mata.

Diatu SDNU dibaruh iring Tan Sri William Mawan Ikom ke nyadi chairman.

Perambu Rumah Dayak di Sibu enggau Mukah

Kelimpah di Kuching, SDNU Sibu mega bisi ngembuan perambu ke sebaka deka numbuhka Rumah Dayak ba mengeri nya. Rambau Pengerami Mantar Gawai Dayak Sibu 2018, pekara tu sekali agi dipansut bela nerima sukung ari Sapit Kepala Menteri Datuk Amar Douglas Uggah Embas.

Nitih penerang berita sebedau terubah iya suba projek Rumah Dayak Sibu diperambu digaga ba semak Nanga Sungai ngerimbai Tebung Batang Rajang, tang udah nya projek tu dipindah ngagai tanah ke diberi perintah pemesai lima ikar ba padang bilun lama Sibu.

Rumah Dayak Sibu deka disikap menyana lalu ngembuan bemacham perengka guna baka palan endur ngatur licha, kelas nenun, balai endur makai enggau lot kedai.

Ungkup pnemu diatu SDNU Sibu dibaruh iring Chambai Lindung ke nyadi chairman gerempung.

SDNU Mukah mega, enda tinggal ngembuan perambu ke sebaka iya nya deka bisi begunan Rumah Dayak kediri empu.

Begunan ke beungkur RM5 juta tu deka digaga ngerimbai Begunan Pehin Sri Raja Mukah.

Berita manah tu dipansutka Chairman iya, Francis Atan rambau Pengerami Makai Lemai Mantar Gawai Dayak SDNU Pampang Mukah taun tu tadi.

Iya madah penemu Rumah Dayak Mukah tu jemah deka ngelai penyerakup bansa Dayak ke bisi ditu kelebih agi lebuh agu maya bisi aktiviti diatur.

Kenu ku Francis begunan nya deka disikap nyendiaka palan endur baum, ngatur licha enggau palan bemalam sementara.

Semua perambu tu endang langgur penemu ke manah lalu dikearap terus dikemujur asil kerejasama semua piak ke pemaik komuniti Dayak di nengeri tu.

alvester bigol columnist

Suara Sarawak